The content originally appeared on:
Diario
Oficina Central di Estadistica cu relato
ORANJESTAD (AAN): E asina yama Indice di Prijs di Consumo, conoci internacionalmente como CPI (Consumer Price Index) na Aruba pa luna di Februari 2024 ta 108.57, loke ta representa un subida di 0.2% compara cu e indice di Januari 2024 (ora cu e tabata na 108.31).
E cambio di e CPI pa e ultimo diesdos lunanan (Februari 2023 te cu Februari 2024) ta 0.9%, un caida di 6.2 punto di porcentahe (ppt) compara cu e periodo corespondiente di aña pasa (7.1%). E promedio anual (ultimo 24 luna) di e tasa di inflacion pa e periodonan di Februari 2021 te cu Februari 2022 y Februari 2023 te cu Februari 2024 ta 2.4%, un caida di 3.7 ppt compara cu e 6.1% registra den e periodonan di Februari 2020 te cu Februari 2021 y Februari 2022 te cu Februari 2023.
Durante e luna aki, cinco di e 12 sectornan a registra subida di prijs. E subidanan cu tabatin e mayor efecto riba e CPI a wordo registra pa e sectornan di “Transporte” (2.5%), “Paña y sapato” (5.1%) y “Mobilario” (1.2%), causando un efecto di respectivamente, 0.31, 0.11 y 0.11 ppt. E subidanan den e restante sectornan a contribui cu un efecto di 0.03 ppt riba e CPI di Februari 2024.
E subidanan aki a wordo contraresta parcialmente door di principalmente un caida den e indice di e sector di “Recreacion y cultura” (-1.4%) cu a contribui cu un efecto di -0.13 ppt riba e CPI di Februari 2024. E caidanan den e sectornan restante a contribui cu un efecto di -0.20 ppt riba e CPI di Februari 2024. E subida den e sector di “Transporte” a wordo causa principalmente door di un subida di 4.0% den e categoria “Gasto relaciona cu uso di vehiculo di transporte personal”, causando un efecto di 0.31 ppt. E subida den e sector di “Paña y sapato” a wordo causa principalmente door di un subida den e categoria “Paña” (4.2%), causando un efecto di 0.07 ppt. E subida den e sector di “Mobilario” a wordo causa principalmente door di subidanan di 5.8% y 3.3% den e categorianan “Aparato pa uso domestico” y “Bienes y servicio pa mantencion ordinario di cas”, causando un efecto cada uno di 0.14 ppt. E caida den e sector di “Recreacion y cultura” a wordo causa principalmente door di caidanan den e categorianan “Vacacion” (-3.0%) y “Corant, buki y papeleria” (-17.5%), causando un efecto di respectivamente, -0.08 y -0.07 ppt.
Canasta di consumo: E canasta di consumo di e CPI ta consisti di 408 bienes y servicionan. Compara cu Januari 2024, 42.6% di e bienes y servicionan aki a conoce un aumento di prijs causando un efecto di 1.04 ppt, mientras cu 41.9% ta mustra un caida di prijs, cu a contribui cu un efecto di -0.80 ppt y pa e restante 15.4% no tawata tin cambio den prijs. Prijsnan di bienes (0.4%) y servicionan (0.04%) a subi y a causa un efecto di respectivamente, 0.22 y 0.02 ppt riba e CPI di Februari 2024.
