Contesta di Secretario di Estado van Huffelen ta duna prueba
- Reino Hulandes a confirma peliger pa seguridad nacional Aruba
- Mas medida Europeo contra Iran cu tin Venezuela como centro
ORANJESTAD(AAN)- Na un forma enfatico DIARIO a sostene e pensamento cu frontera entre Venezuela y Aruba no por wordo habri den e actual sistuacion.
Cu informacionnan concreto riba e impactonan negativo cu apertura di frontera cu Venezuela por tin riba e bienestar di Aruba na e momentonan aki, DIARIO a indica cu Reino Hulandes no por mara Aruba na apertura di su porta cu Venezuela sigur den e situacion mundial caotico actual.
Gobierno di Aruba a demostra cu e ta sumamente cauteloso cu e apertura di frontera cu Venezuela, pero segun Statuut ta Hulanda ta atende e relacionnan exterior di Reino y asina e materia aki tambe.
E puntonan cu DIARIO a trece continuamente dilanti riba apertura di e frontera cu Venezuela, ta bini dilanti den e contesta oficial di e Secretario di Estado Hulandes pa Relacionnan den Reino, Alexandra van Huffelen.
Durante tratamento di presupuesto Hulandes den Parlamento di Hulanda, preguntanan a wordo lansa riba e materia.
Preocupacion den mundo politico Hulandes enfrente e desaroyonan a keda presenta y e pregunta a wordo haci riba cual termino por spera un normalisacion na e frontera entre Venezuela y Aruba.
Na un forma explicito a wordo puntra si tin reto adicional den e apertura di entre Venezuela y Aruba.
Secretario di Estado Alexandra van Huffelen a indica cu e ta comparti e punto di bista cu mester tin un bon control cu ta evita cu un situacion preocupante ta desaroya na e fronteranan entre e dos paisnan.
Cu reapertura di frontera, tin mas trafico na tera y lama. Den esaki no por exclui mas entrada stranhero y tambe mas importacion di contrabanda.
Dos punto concreto cu tabata preocupacion basico di DIARIO a wordo expresa dor di e Secretario di Estado Hulanda, cu a mustra cu su departamento durante e proximo añanan lo sostene un fortificacion di e control na frontera.
Den e cuadro aki, su departmaneto lo reforsa e control cu 71 miembro di personal di Marechaussee Real.
Tambe lo reforsa Aduana y lo inverti 16 Miyon Euro den servicionan local.
Manera DIARIO a trece dilanti ayera, Hulanda a reuni cu Venezuela riba e situacion actual na frontera.
Na prome momento e representante di Reino cu a topa cu regimen Maduro no a duna mucho informacion riba contenido di su combersacion cu Venezuela.
Segun Secretario di Estado pa Relacionnan den Reino ayera a trece dilanti, e Ministerio di Asuntonan di Exterior di Reino Hulandes na Venezuela, na nomber di Reino a solicita un consulta cu Venezuela pa papia riba un reapertura di e frontera den fase.
Esaki ta haci cu por lo pronto no por duna un fecha pa reapertura di e frontera.
Mester bisa cu e ponencia di Hulanda ta cuadra cu e reserva y posicion cauteloso di Gobierno di Aruba tambe riba e topico asina importante pa Aruba den un tempo di problema mundial, den cual Venezuela ta hunga un papel cada dia mas grandi.
Informacionnan cu a drenta ayera na DIARIO ta sigui papia di un situacion peligroso y e temor internacional, cu Venezuela ta wordo desaroya como centro operacional di Iran den e region.
Union Europeo a impone mas sancion riba Iran pa sosten na Vladimir Putin cu ta ocasiona actualmente un matansa na Ukraine cu atakenan pisa.
Manera DIARIO a splica na hopi ocasion, na nivel internacional tin temor grandi enfrente centronan regional cu ta sostene Vladimir Putin y su lucha sangriente na Ukraine.
Venezuela ta sigui crece como centro Irani den region Caribense y Latino Americano, loke sigur ta wordo vigila na nivel internacional.
Industria petrolero di Venezuela ta sostene e interes Irani cu a construi un refineria na Venezuela cu Iran ta menciona como su punto di salida di negoshi den azeta.
Na Argentina siman pasa, cinco miembro di tripulacion di un avion Venezolano a recobra nan libertad despues di a keda deteni pa basta luna pa sospecho cu nan ta gelink na terorismo.
Tres di e miembronan di tripulacion tabata di Iran y dos di Venezuela.
Den e situacion actual, trafico di hende entre Venezuela y Aruba, mester wordo considera un peligro sigur si tene na consideracion e temor internacional enfrente abuso di migracion pa teroristanan haci nan entrada na otro pais.
