Homber di 28 aña a abusa di mucha muher di 14 aña

The content originally appeared on: Diario

Fiscal a exigi 3 aña di prison —  ORANJESTAD (AAN): Diabierna mainta e homber T. (29) a scucha Fiscal bisa cu e ta haya T. culpable di a haci actonan inmoral esta mishi y


tambe di a penetra e mucha (14) cu su dede. Fiscal a tuma T. na malo, kende ta nenga di a mishi y penetra e mucha. Segun T. ta solamente un sunchi el a duna e mucha. Fiscal a exigi 3 aña di prison di cual 6 luna ta condicional cu un tempo di prueba di 3 aña.

ACUSACION DI FISCAL

E acusacion cu Fiscal a presenta den Corte contra T. ta cu entre 1 Maart 2020 y September 2020, el a mishi cu e mucha y penetra e mucha cu su dede.

   Den sala di Corte tabata presente e mama di e mucha, kende a haci demanda di daño contra T. Ta asina cu T. tabata un koki na un hotel pero door di e lamentable incidente aki a perde su trabao ora el a wordo deteni e aña aki.  

SOSPECHOSO TA NENGA

Hues a puntra T. si e acusacion ta cuadra. Segun T., e no a mishi y tampoco penetra e mucha. El a bisa Hues cu ta e mucha a sunchi e y el a pusha e mucha. Despues durante tratamento di e caso, T. a bisa cu e mucha a sunchi e, y el a sunchi e mucha y push’e.

ABUSA DI RUMAN DI SU PARTNER

Hues a mustra cu T. su pareha a trece su ruman chikito biba cerca nan na un cas di dos pisa. Na e cas tabata biba tambe e mama di e pareha di T. Segun e mucha, T., kende e tempo ey tabatin 28 aña, tabata blo wak e. El a bisa cu e tabata abao den e promer piso y T. tabata hunga play station. Na dado momento T. a bay riba dje y mishi cu su pecho. E mucha a reacciona y T. a bis’e pa no bisa nada. E mucha a sigui declara cu despues di un luna, ora e tabata den cushina, T. a bolbe bay mishi cu su pechonan. E mucha a bay di biaha den camber di su mama pero no a bisa nada. Su siguiente dia, T. a bolbe haci mesun cos y a hinca man den su panty y hinca dede den su parti intimo. E mucha a reacciona contra esaki. Segun e mucha, T. a bolbe mishi cun’e ora su mama y rumannan ta den di dos piso. Un biaha e tabata abao y T. a bay drumi riba dje y kita su paña y cuminsa chupa su pechonan. E mucha a bolbe reacciona. El a bisa Polis cu e abuso a manera bira un custumber, siendo cu esaki ta contra di su voluntad. E ta haya cu T. tabata keda mir’e manera un maniac. Segun e mucha, na September 2020 promer cu T. y su ruman a bay biba otro caminda, T. a bolbe mishi cun’e. El a hala T. su atencion pa e stop sino e ta bay conta kico T. ta haciendo.

MUCHA TA BASHA ABOU NA SCHOOL

   Un dia, e mucha a haya problema na school y e ora ey el a basha abou na maestra di school. E ora ey e maestra a informa e mama. E ruman muher a bay cerca e victima y e victima a conta tur cos. E ruman a reclama T. y bisa cu como adulto (28) mester sa cu no por mishi cu mucha. El a reclama T. cu e tin un yiu muher y con e por haci algo asina.

Na dado momento, e forma con Hues tabata confronta T. cu e declaracionnan, a pone cu T. a dicidi di papia. El a bisa Hues cu e mucha a bay pa dun’e un sunchi y el a duna e mucha un sunchi y despues push’e. Segun T., ta esey so a pasa.,

SOSPECHOSO A ADMITI RIBA CHAT

   Hues a mustra cu tin chatnan di Whatsapp, caminda e ex partner tabata yama T. pa pedofil y reclama T. pa loke el a haci. T. a bisa cu awor ta culp’e pero ta e mucha a cuminsa. E ex partner a bisa T. cu e no mester a mishi cu e mucha mes. Hues a mustra cu T. mes ta admiti di a mishi cu e parti intimo di e mucha. Hues a mustra cu T. a bisa su ex partner cu el a resa hopi pidi Dios pordon pa loke el a haci. Hues a bisa cu for di e chatnan por conclui cu T. a mishi y a penetra e mucha.

DEMANDA DI DAÑO

E mama a entrega na Hues documento cu e demanda. E daño inmaterial el a exigi 6 mil florin. Hues a lesa e carta cu tabata hunto cu e documento caminda psicologo ta splica cu e mucha ta bou tratamento. mucha ta bou tratamento di psicologo. Tin carta di psikiatra di mucha cu ta bisa cu ta atendiendo e mucha. E mucha tabata den crisis pisa y cu intension di kier mata curpa. Psicologo ta mustra cu e mucha a mantene silencio tur e tempo pa evita crisis den famia. El a mustra cu e mucha ta bou tratamento. Tambe e mama ta demanda 2500 florin como gastonan di abogado.

EXIGENCIA DI FISCAL

Fiscal a bisa Hues cu e ta haya straño cu e ex partner di T. ta yam’e pa pedofil y reclam’e y T. no ta bisa nada. Den casonan di actonan inmoral y abuso hopi biaha no tin prueba. Tin cu busca pruebanan di sosten. For di maestra di school a bin constata cu e mucha tabata afecta. Su cifranan a bay atras y e mucha a conta loke a pasa cun’e. Fiscal a señala cu ora e ex partner a reclama T. di a hinca dede den parti intimo di e mucha, T. no a bisa nada. Segun Fiscal, T. a bisa e ex partner cu despues di esey, el a stop y no a haci nada mas. Fiscal a bisa cu e no ta kere e storia di T. cu e mucha di 14 aña kier tabatin relacion cun’e. El a bisa cu si a caso algo asina pasa, T.(28) mester a par’e y bisa su ex partner. Alcontrario, T. no a bisa su ex partner nada.

   Pa loke ta e demanda di daño inmaterial di 6 mil florin, e ta haya esaki acceptable. Pa loke ta e demanda di gasto di abogado, Fiscal ta haya cu esaki no ta acceptable. El a pidi Hues pa aplica e tarifa pa yena un demanda cu ta 176 florin. E resto di 2500 florin ta wordo declara no admisibel.

CASTIGO

Fiscal a bisa cu casonan di inmoralidad ta causa hopi iritacion den comunidad. Esey ta mustra cu mester manda señal bon cla cu no ta tolera e actitud aki. Fiscal ta haya cu T. como adulto di 28 aña mester a para e mucha. El a exigi 3 aña di prison di cual 6 luna ta condicional cu un tempo di prueba di 3 aña. Fiscal a bisa cu e ta exigi tambe pa prohibi T. pa drenta den contacto cu e mucha.  

ABOGADO

Mr. Zara a bisa Hues cu den Corte ta basa riba prueba convicente. El a mustra riba e chatnan di Whatsapp pero no tin ningun prueba di cu T. lo a hinca dede den parti intimo di e mucha. Pa loke ta e resto di e caso, tin pruebanan cu T. a haci su mes culpable na un acto inmoral. E pregunta ta si e exigencia di Fiscal di 36 luna di prison di cual 6 luna ta condicional ta na su lugar. E abogado no ta haya cu mester bay castiga T. asina largo pa algo cu e no a actua corectamente manera bisa su ex partner kico su ruman chikito tabata haci.

E abogado a bisa Hues cu no ta asina cu ta diferente biaha y lunanan largo esaki a sosode. T. mes na dado momento a dicidi di muda di e cas. E ta haya e castigo exigi demasiado halto. El a pidi Hues pa tene cuenta cu T. ta hoben y tabata traha. Pidi Hues pa duna un castigo caminda e parti condicional y tempo di prueba ta mas largo pa asina pone presion riba T. pa no haci algo asina mas. Pa cu e demanda di daño, e 2500 florin como gasto di abogado no tin recibo. Mr. Zara ta comparti punto di bista di Fiscal. Pa loke ta e demanda di 6 mil florin, e ta haya cu mester declara esaki no admisibel y laga den un caso civil determina esaki.  Hues a sera tratamento di e caso y a bisa cu e ta bay studia e caso y dia 3 December 2021 lo tin sentencia.