The content originally appeared on:
Diario
Director di WGK, Gino Goeloe:
ORANJESTAD (AAN) Director di Wit Gele Kruis, Gino Goeloe tambe a dirigi palabra durante e conferencia di prensa y acto di firmamento di e acuerdo pa continuacion di e servicio di POH’s.
Goeloe ta corda con 12 aña pasa su persona mes a pensa cu mester bin un cambio, pa loke ta cuido medico, pero ora ta bin un cambio semper ta haya resistencia p’e. Den e caso aki, a cuminza cu tres POH, como proyecto di AZV, y e ta corda cu e tempo ey dr.Van Veen (den feliz memoria) a bise “kico ta e importancia di un POH?” y el a splic’e kico ta e beneficio di esaki, y tempo cu e dokter a experimenta esaki, el a bisa cu esey ta bon. A bira historia y POH a bira algo formal na Aruba.
Goeloe a señala cu awendia tur sa cu e ta un team work y 12 aña despues por bisa cu e ta un exito rotundo. E ta bisa esey pasobra Curacao y Bonaire a acerca Aruba y a copia di Aruba. Goeloe a comenta cu na November 2023 el a bay Bonaire pa graduacion di nuebe POH. Pa 29 di Juli Curacao tambe a instala diez POH.
Goeloe a felicita Minister di Salud cu a kere den e vision aki y a sigui cu ne, no solamente na Aruba pero den e Islanan ruman Curacao y Bonaire tambe, y nan ta orguyoso di nan POH’s.
El a expresa cu Aruba mester ta orguyoso di a comparti su conocemento na e Islanan aki tambe. Tambe e ta felicita Minister Oduber pasobra a amplia e POH’s pa e parti di salud mental cu ta algo hopi importante. El a referi den e caso aki, na e tabu cu tin den pueblo rond di psiquiatria. El a traha diez aña na PAAZ Afdeling y sa di e berguenza cu hende tabata haya di bishita e lugar, pa otronan pensa cu e tin algo mental, y esey ta sosode un tiki te ainda.
Goeloe ta kere cu e POH’s den e area aki por centraliza mucho miho yega HUNTO y Respaldo, y asina yuda nan mas trempan, eficiente y mas lihe tambe, cu nan problema mental.
El a gradici AZV cu a kere den WGK pa 12 aña consecutivo, y na Minister cu a amplia e servicio aki pa e aseguradonan. El a subraya cu mester keda fortalece e parti di prevencion. WGK semper a kere den prevencion for di baby caba ora nan duna e angua te 4 aña, pa preveni malesanan contagioso. Aruba a score mas halto den e Region Caribense cu e vacunacion aki di baby, incluso a sali miho di mundo. Pues, Aruba tin hopi cos bon pa mustra eyfo. Finalmente, el a expresa cu como Director di WGK e ta hopi orguyoso di su personal, a bisa cu “Prevencion ta e solucion”!
