The content originally appeared on:
Diario
ORANJESTAD (AAN): E siman aki, Aruba Trade & Industry Association (ATIA) hunto cu Departamento di Impuesto (DIMP)
a organiza nan segundo sesion informativo y practico exclusivamente pa miembronan di ATIA.
E biaha aki e topico tabata digitalizacion di Impuesto riba ganashi di compania “winst belasting” (WB). “DIMP a informa ATIA den un reunion na Januari cu lo bay digitalisa e proceso di declaracion di WB”, director di ATIA Sr. Herrick Henriquez a splica. Ora nos a worde informa di esaki, mesora a tuma e iniciativa pa puntra pa organiza un sesion pa nos miembronan ora ta mas cerca di e fecha di implementacion. Sesionnan asina ta importante pa no solamente facilita y informa nos miembresia, pero tambe pa segura cu nos miembronan cumpli cu tur rekisito pa entrega nan WB na tempo.
Den un sala yen di comerciante representando diferente sector, Directora di DIMP, Señora Luenne Gomez-Pieters y su team, no solamente a duna un splicacion amplio ariba e cambionan di WB, pero tambe a repasa e manera nobo pa entrega e WB den nan sistema di Bo Impuesto (BOi). Awe 16 di Mei ta Lanza oficialmente e documento nan digital den BOi.
Pa facilita tur pagador di Impuesto, DIMP a crea un “helpdesk” specialemente pa cu e WB online.
E iniciativa aki no ta e prome cu ATIA a haci cu DIMP, pero na Maart tabata tin un sesion cu topico di BBO na Frontera cu tabata completamente yen. E sesion menciona anterior tabata uno cu a haci como prueba, pero door di e acogida sumamente exitoso a dicidi pa haci mas sesion asina pa miembresia di ATIA. Director di ATIA a indica cu “e meta di sesionnan asina ta pa trece comerciante mas cerca di DIMP y asina crea un conexion y relacion mas personal cu Management Team di DIMP, pa asina por cumpli cu tur deber pa ta un comerciante ejemplar.
Tin cu bisa cu e participantenan a sugeri pa haci sesionnan asina mas biaha pero tambe ariba otro temanan manera impuesto riba salario (“loonbelasting”), e ley di WB y BBO en general. Directora di DIMP a informa cu lo ta dispuesto pa organiza sesionnan asina regularmente.
ATIA ta satisfecho cu e resultado di e segundo sesion y ta gradici Directora di DIMP y su team pa nan tempo y pa host e sesion na Oficina di DIMP. ATIA ta invita tur comerciante y miembro pa keda pendiente pa e siguiente sesion cu nos lo anuncia riba nos rednan social. Si tin pregunta of kier mas informacion di miembesia y su benifisionan, por semper tuma contacto cu e team di ATIA.
