The content originally appeared on:
Diario
Escape di talentonan ta keda un reto pa Aruba
*Mester considera e ‘smallness’ di nos isla como un creatividad
ORANJESTAD (AAN): Aruba ta enfrentando un gran reto cu e escape di talentonan (brain-drain). Hopi hoben profesional ta regresa Aruba buscando oportunidadnan, pero nan ta topa cu e barera di no tin suficiente trabou disponibel. Esaki ta afecta nan seriamente.
Un historia cu ta pone enfasis riba e dificultadnan ta esun di Simon Waslander, un hoben profesional cu a bin Aruba cu su diplomanan den man y un vision pa contribui na e isla. A pesar di su esfuersonan, ainda e no a logra realiza su meta profesional na Aruba.
Simon a nace na Aruba. El a bay Colegio Arubano y cu su 18 aña el a bay studia na Hulanda. “Te cu awo nos por bisa cu mi storia ta uno feliz. Pero mi caminda pa yega na esaki tabata uno sumamente doloroso riba nivel personal y uno hopi tristo pa pais Aruba en general.
Mi a studia Medicina na Universidad di Groningen na Hulanda. Durante e estudio, mi a sinti mi hopi mas inspira y motiva locual ta e aspectonan di innovacion y ‘business’ di salubridad. Pesey, despues di a completa mi Bachelor in Science, a dicidi di cambia mi estudio y m’a haci un ‘Masters in Science of Healthcare Management, Policy & Innovation’ di Maastricht University. Cual mi a completa exitosamente.
Aunke el a crea un netwerk na Hulanda hopi amplio den Salubridad cerca academiconan renombra, door cu su tata ta sufri di dolor neuropatico di hernia, cu su diplomanan den man, cu recomendacion personal di tres Professor di Hulanda, el a dicidi di bin Aruba buscando un periodo di estabilidad. “Yena cu speransa y briyo pa sirbi nos pais cu mi sabiduria, educacion y netwerk internacional”, Waslander a duna di conoce.
El a solicita trabao na Hospital, SABA, Respaldo y diferente otro institucion di salubridad na Aruba como tambe gobierno. E contesta tabata cu no tin vacature cu ta pas p’e of gewoon keda sin haya contesta.
Den esaki, el a dicidi di lanta un compania di salubridad cu sosten por escrito di 4 diferente Professor na Leiden y Groningen. Entre otro di Professor Dr. Ewout Steyerberg cu den e tempo ey tabata den Top 20 academico bibo mas influyente na mundo.
A propone e vision 5 aña pasa di ‘Predictive Health Aruba’ na AZV y Ministerio di Salud
Oduber. Te hasta el a duna un lectura pa e studiantenan di Leiden riba e proyecto aki. Atrobe, tur su iniciativanan a wordo nenga, Simon a remarca.
Simon toch e keda positivo y asina a cuminsa traha ‘online’ den diferente proyecto mirando cu na Aruba e no por a logra concreta su soño profesional.
“Mientrastanto, mi a haya varios oferta di companianan avansa. Eynan mi a haya mi experiencia di trabao di traha den companianan sumamente avansa den sector priva. Atrobe tur e companianan aki a tuma mi experticio cu man habri y di manera inmediato.
Pero esey tabata un periodo hopi dificil pasobra entradanan no tabata stabiel y e werkdruk tawata halto. Basically, mi tabata trahando por nada pa haya experiencia. Mi a keda 4 aña sin
entrada stabiel na Aruba, sin ningun bista tampoco riba un futuro. Mi a bay DPL, m’a cuminsa
solicita pa trabounan minimuumloon di hotel, of trabou di secretario na abogado. M’a solicita 3 biaha
na Hospital, AZV, Setar y tanto otro entidad mas.
Na un momento mi tabata asina desespera cu m’a yena e formularionan pa ‘Onderstand’ na Sociale Zaken. Pero a dicidi di no entrega esaki. M’a cuminsa sufri di paniek-aanval y depresion”.
Simon a menciona diferente otro intentonan cu el a haci pa haya trabao na Aruba y cu te hasta recomendacionnan di Professors di Hulanda y otro personanan renombra, pero ni esaki a yuda.
Den tur esey el a sigui lucha, sigui post articulonan riba LinkedIn. Asina el a yega den contacto cu kende e tempo ey tabata KPMG Iceland Consultant, Guido Picus, otro yiu di tera. “Cu danki na
su ayudo profundo cu nunca mi lo lubida, a habri su netwerk pa mi persona. Esaki a lansa
mi carera internacional te cu mi por a papia na conferencianan internacional di KPMG, ta skirbi articulonan y duna entrevistanan pa revistanan internacional di Salubridad y hopi mas.
Mas recien, Simon Waslander a wordo introduci na e Managing Director di Swire
Consulting & Capital. Asina el a drenta e mundo di consulting internacional di sector priva y den
e mundo di capital.
“E ta un trabou hopi versatil mes, unda ta bin den contacto cu companianan priva full rond mundo den tur ramo di tecnologia y innovacion. Mi gusta e aspecto intelectual di mi trabou masha hopi mes y cu e netwerk internacional na nivel ‘world-class’ cu mi ta haya mi aden.
Pero c’un Arubiano, yiu di tera cu a bin yena di speransa pa sirbi su Pais, wordo castiga den
manera asina profundo door di su mesun hendenan, pero pa wordo celebra door di tur hende cu ta
pafo di Aruba ta algo cu mi no lo desea of recomenda na ningun Arubiano studia cu kier bin
Aruba bek”, Waslander a finalisa bisando.
E escape di talentonan ta un desafio grandi pa un isla manera Aruba, unda tur persona ta importante. Pa resolve e problema aki, mester enfoca riba crea oportunidadnan local pa retene e talentonan.
Gobierno, sector priva, y organizacionnan sin fin di lucro mester traha hunto pa promove un cultura di desaroyo profesional na Aruba. Mester inverti den educacion y crea mas aliansanan cu universidadnan internacional pa desaroya oportunidadnan di estudio relevante pa e isla.
Pa supera e reto di e escape di talentonan, ta importante pa considera e limitacionnan di nos isla (smallness) manera un oportunidad pa crea, un motivacion pa traha hunto pa un futuro prospero pa un y tur.
Simon Waslander ta un colaborado di DIARIO dunando su contribucion cu diferente articulo di analisis di temanan actual.
