FCCA ta lansa DigiBID pa innova, modernisa y fortalece proceso di bidding

Directora di FCCA, señora Julie Wever:

ORANJESTAD (AAN) Den su compromiso pa sigui modernisa y innova su servicionan, Fundacion Cas pa Comunidad Arubano (FCCA) a lansa DigiBID, un plataforma digital cu ta permiti contratistanan y otro empresarionan entrega nan propuesta (bid) di un manera mas facil, lihe y sigur.

   DigiBID ta un sistema completamente encrypted y sigur, diseña pa garantisa transparencia durante tur e proseso di bidding. Tur bid cu wordo entrega ta keda completamente seya, y ningun persona, ni paden di FCCA ni otro participante den e proceso, por wak e suma proponi di otro participantenan te ora e fecha oficial di e bidding tuma luga.

   Directora di FCCA, señora Julie Wever, a describi e lansamiento di DigiBID como un paso importante den e modernisacion di e fundacion. Asina FCCA ta innova, modernisa y fortalece proceso di bidding

   Segun señora Wever, FCCA tin varios proyecto grandi den preparacion. Dentro di poco tempo lo wordo publica un licitacion pa un proyecto di construccion di 75 cas na Kiviti, mientras tambe lo habri e proceso di bidding pa e renovacion di 21 apartamento na Wilhelmina Straat.

   “Esaki ta e preparacion pa invita tur nos contratistanan riba mercado pa participa den nos proyecto, sin exclui ningun persona. Pa FCCA inclusion ta hopi importante”, señora Wever a enfatisa.

   E plataforma ta habri pa companianan chikito, mediano y grandi, incluyendo empresanan cu ta ofrece servicionan specialisa. Por ehempel, un contratista den ramo di electricidad por registra pa ricibi invitacion pa proyectonan relaciona cu su area di specialisacion.

   Wever a splica cu, cada biaha cu un proyecto cu ta coresponde cu e specialisacion di un contratista wordo publica, e empresa registra lo haya un notificacion via e-mail, y e por entrega su propuesta directamente riba DigiBID di un manera facil, lihe y completamente sigur.