Gobierno a anuncia un pakete amplio di ayudo financiero social

Despues di un evaluacion profundo di e costo real di bida

ORANJESTAD (AAN): Gobierno a anuncia un pakete amplio di ayudo financiero social cu ta destina pa fortalece e poder di compra di nos famianan cu menos recurso y yuda nan cu e gastonan adicional cu ta bin cu e inicio di un aña escolar nobo.

Durante un conferencia di prensa, Prome Minister mr. Mike Eman, hunto cu Ministro di Asuntonan Social, Salud Publico, Cuido di Adulto Mayor y Adiccion drs. Mervin Wyatt-Ras, a splica cu e decisionnan ta resultado di un evaluacion profundo di e costo real di bida y di e necesidadnan cu hopi famia ta enfrenta den comunidad.

"Un aña escolar nobo semper ta trece reto financiero pa tur famia, pero specialmente pa esnan cu tin menos recurso," Prome Minister Mike Eman a bisa. Segun Eman, Gobierno, hunto cu Ministerio di Asunto Social, a haci un inventarisacion pa determina con e diferente tipo di asistencia financiero por yega mas cerca posibel na e minimo di existencia cu un famia mester pa cubri su gastonan esencial. "Nos meta ta pa e combinacion di e diferente sosten por yega mas cerca posibel na e prestacion minimo cu un famia mester pa por biba."

Como resultado di e evaluacion ey, Gobierno ta mantene e aumento di e bijstand basico di AWG 450 pa AWG 600 pa luna. Ademas, e schooltoeslag anual a aumenta di AWG 250 pa AWG 300 pa mucha, cu un maximo di AWG 1.100 pa famia. Tambe e contribucion pa schoolgeld a subi di AWG 120 pa AWG 250 pa mucha, mientras cu e yudansa pa compra di articulonan escolar a aumenta di AWG 250 pa AWG 300 pa mucha, cu un maximo di AWG 1.000 pa famia. Segun Prome Minister Mike Eman, e aumentonan ta basa riba un inventarisacion di e costonan real cu nos mayornan ta enfrenta pa schoolgeld, material escolar y otro gasto relaciona cu e inicio di e aña escolar.

Prome Minister Eman a expresa su reconocemento na Minister Wyatt-Ras, e personal di Ministerio di Asuntonan Social y Minister di Finansa mr. Geoffrey Wever pa e trabou cu a haci posibel den implementa e cambionan aki dentro di e presupuesto existente.

Den mes e conferencia di prensa, Prome Minister Mike Eman a enfatisa cu e aumentonan pa e aña escolar nobo ta forma parti di un strategia mas amplio pa combati pobresa y fortalece e poder di compra. Segun Eman, durante e consultanan cu varios fundacion, organisacion social y instancia cu ta traha den bario, un di e preocupacionnan cu mas a wordo comparti tabata e aumento di pobresa den e ultimo tempo.

"Nos a scucha hopi biaha cu e poder di compra di hopi famia a deteriora. Pa e motibo ey nos a decidi concentra riba e gruponan cu mas mester di apoyo," Prome Minister Mike Eman a declara.

Eman a splica cu Gobierno a pone tres grupo como prioridad. E prome grupo ta nos pensionadonan. Pa nan, Gobierno anteriormente a aumenta e AOV cu AWG 500 pa pensionadonan soltero y AWG 900 pa e pensionadonan casa. Segun Prome Minister Mike Eman, e reaccionnan di e pensionadonan a confirma cu e medida a ofrece un alivio importante den nan presupuesto mensual.

E di dos grupo ta personanan cu ta depende di bijstand y nos hendenan cu un limitacion. Den e cuadro ey, Gobierno a aumenta e beneficio pa e personanan cu un limitacion cu AWG 100 pa luna, efectivo for di 1 di augustus. Ademas, Prome Minister Mike Eman a anuncia cu Gobierno ta den e etapa final di preparacion di un concepto di ley cu lo crea un beneficio financiero structural pa e famianan cu mucha cu necesidad special.

Segun Eman, e concepto di ley a wordo desaroya bou di liderasgo di Minister Mervin Wyatt-Ras y, despues di un amplio proceso di consulta cu e organisacionnan y instancia cu ta traha cu e muchanan cu tin necesidad special, Gobierno a incorpora nan recomendacion den e propuesta. Actualmente e concepto ta den su ultimo fase di revision legal y Gobierno ta spera di por presenta esaki na Parlamento den algun siman. "E ley aki lo yuda miles di famia cu diariamente ta enfrenta gasto adicional pa tratamento, terapia, medicacion y otro servicio special cu nan muchanan mester," Prome Minister Mike Eman a splica.

E di tres grupo cu Gobierno ta enfoca riba dje ta e trahadornan cu salario minimo. Prome Minister Mike Eman a anuncia cu un proyecto di ley ta den preparacion pa aumenta gradualmente e salario minimo cu AWG 500 den tres aña, pa e yega na e minimo di existencia. Segun el, e aumento lo wordo implementa paso pa paso, teniendo cuenta tambe e capacidad di nos empresanan, specialmente e empresanan chikito, pa por tin capacidad pa absorba e ahustenan.

Prome Minister Mike Eman a conclui cu, den apenas dos aña di mandato, Gobierno ta cumpli cu un parti esencial di e compromiso cu a haci cu pueblo di Aruba. "Nos kier cu nos hendenan cu ta biba cu un entrada limita sinti cu Gobierno ta mira nan, ta scucha nan y ta actua. Nos kier cu cada famia cu tin necesidad haya e sosten cu realmente ta haci diferencia den nan bida."

Na final di e conferencia di prensa, Prome Minister Mike Eman a haci un yamada na e famianan cu por cualifica pa e diferente tipo di asistencia financiero pa acudi na Departamento di Asuntonan Social pa ricibi informacion y verifica pa cual beneficio nan ta cualifica. E ahustenan aki ta un paso importante den e esfuerso continuo di Gobierno pa fortalece e siguridad social y trece mehora den e calidad di bida di e gruponan mas vulnerabel di nos isla.