The content originally appeared on:
Diario
Segun presidente di FTA, Hose Figaroa:
ORANJESTAD (AAN)—Hose Figaroa, presidente di e Federacion di Trahadornan di Aruba (FTA) a bisa den entrevista cu DIARIO, cu prome cu pensa den importa trahado, mester inventariza locual tin caba den nos mercado laboral, y esaki ta inclui esnan cu ta indocumenta.
Figaroa ta argumenta cu Gobierno mester bin cu un plan structura pa legaliza esnan cu ta ilegal na Aruba, cu por ta tin tres of cuater aña caba minimo indocumenta akinan. Kiermen tres of cuater aña formando parti di Aruba su economia caba y tin un lugar di biba.
Unico cos cu mester haci ta legaliza su situacion, pa lo demas nada ta cambia. Na momento cu trece hende di afo pa traha na Aruba, e mester di un caminda di biba, y tin yen di factornan extra cu ta bin cune, cu pa esun cu ta na Aruba caba ta cuminza e proceso pa legaliza su status aki.
Pa gobierno ta nifica ricibi belasting, primanan social, etc., di e personanan aki pasobra e ta bay traha na un forma legal, y asina ey ta bay haya un miho bista tocante kico ta di berdad loke e mercado laboral mester pa importa.
“Pasobra ta un hecho cu na Aruba, cu e cantidad di cambernan cu mester habri ainda, nos no tin suficiente trahado. Cu nos mester bay importa trahado ta un hecho, pero con ta hay haci esey?” Hose Figaroa ta cuestiona.
Papiando di forma hipotetico, Figaroa a bisa si por ehemplo tin mil funcion habri, pero di e mil ey por ta 300 por wordo yena door di hende local incluyendo indocumenta tambe. Anto na lugar di importa mil hende por ta 700 so mester importa. “Y hopi importante tambe ta, no haci e erornan cu nos a comete na fin di añanan 80 cuminzando 90, unda cu no a pone exigencia na e tipo di trahado cu nos a importa. Pakico? Pasobra e tempo ey nos a importa hendenan di un edad mas halto, kizas 40-45 aña, pero kico ta pasa? Cu e hendenan ey ora ta yega edad di pensioen, e cantidad di añanan cu nan ta contribui pa, por ehemplo, pensioen di behez no ta suficiente. Aworaki nan ta yegando edad pa baha cu pensioen y esaki ta minimo por ta 300 of 400 florin. Kico ta pasa ta cu e hendenan aki no por stop di traha pasobra cu e tiki placa ey no por sobrebibi”, Figaroa a remarca y ta aconseha pa aworaki busca hende cu por contribui un tempo mas largo den e mercado laboral.
