The content originally appeared on:
Diario
ORANJESTAD (AAN): Manera cu DIARIO a trece dilanti luna pasa, e prijs di combustibel den region ta sigui subi,
awor cu poco-poco verano ta yegando. Na Merca tambe prijs di gasolin a subi y yega bek na e prijs di seis luna pasa.
Prijsnan ta subiendo rond mundo, debi na prijs halto di crudo, tambe tin hopi refineria para keto debi cu nan ta ricibiendo mantenimento, y sin lubida e turbulencia internacional den mercado di energia, cu ta sigui afecta cartera di e automobilista tanto na Aruba como den exterior.
Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante awe 10 april 2024:
Gasoline unleaded-premium lo subi cu 11,3 cen, pa wordo bendi awor na 266,9 cen pa liter.
Diesel Low-Sulphur lo baha cu 6,3 cen, pa wordo bendi awor na 230,1 cen pa liter.
Kerosin ta baha cu 4,9 cen, pa wordo bendi awor na 210,9 cen pa liter. E prijsnan ta inclui BBO/BAZV/BAVP.
