FADA a lansa e proyecto NIX-18 special pa hobennan entre 14 cu 17 aña

​

Pa concientiza menornan di 18 aña pa no bebe alcohol:

ORANJESTAD (AAN)—Den conferencia di prensa yama pa Fundacion Anti Droga Aruba (FADA), e Trahador Social (Preventivo) Rubiela Toppenberg a splica di kico e lansamento di un proyecto nobo NIX 18, ta nifica.

            Toppenberg a señala cu e proyecto aki ta specialmente pa nos hobennan entre 14 cu 17 aña, y a comenta cu FADA hunto cu Fundacion Zinnia, ya pa algun aña caba tin su campaña Amigo Didi, pa personanan mayor di 18 aña pa no maneha vehiculonan di motor bao influencia di alcohol.

“Nos a mira cu e campaña aki tin un acogida grandi, y pesey tambe nos a dicidi di lansa un proyecto unda nos ta bay cuminza concientiza, ya prome cu 18 aña.

            Mirando cu basta aña nos ta mira un problematica grandi y basta serio cerca nos hobennan, na momento cu nos toca e tema di alcohol.

Alcohol, manera nos sa, ta un droga legal hopi facil y accesibel pa nos hobennan, y pesey nos tin e meta grandi cu NIX-18 pa concientiza y educa nos hobennan entre 14 cu 17 aña pa loke ta uso di alcohol, cu ta trece consecuencia pa salud di e hoben y hopi importante, pa su cerebro”, Rubiella a splica.

            El a sigui bisa cu NIX-18 a wordo lanza luna pasa cu un charla cu a haya hopi acogida cerca e hobennan, nan a haci hopi pregunta, a kita cierto dudanan cu tabata tin. Tambe por a mira caranan un tiki mas spanta, pasobra ora nan a wak e consecuencianan cu ta bin cu esaki, nan a para keto un rato y haci nan preguntanan tambe.

            “Nos ta hopi contento cu e resultado y con scolnan ta pidi pa esaki, y pesey nos ta pidi tur cabesante di scol cu a interesa pa trece e charla aki pa nan scol, pa tuma contacto cu FADA libremente, pa bo booking y bo scol ricibi e charla NIX-18”, Rubiella a subraya.

            E charla aki ta tuma 45 minuut y cu ne e hobennan ta haya, na final, un sticker cu FADA a traha pa e hoben pega na un lugar y nan recorda cu no mester uza alcohol pa ta parti su grupo of di un gang.

NIX 18 ta accesibel henter e aña pero esaki ta e temporada unda FADA ta enfoca riba e tema, y esaki ta e ultimo fin di siman di carnaval y durante carnaval por mira cu tin hobennan cu ta uza y hasta abusa di consumo di alcohol.

            “Nos ta haci yamada na tur e  hobennan bao 18 aña cu tambe ta mira nos, pa sea conciente y scoge pa no uza alcohol y nos ta spera cu pronto nos haya nan na scol pa duna bo tur e informacion aki. Si tin mayor cu tambe kier haya e informacion aki tuma contacto cu nos. FADA ta haci tambe gruponan pa duna nan informacion. Sinti liber, nos ta basta flexibel cu esaki y idea ta pa e informacion yega eyfo y esaki ta loke nos kier logra tambe cu NIX-18”, Rubiella Toppenberg, Trahador Social di FADA, a remarca.