The content originally appeared on:
Diario
Weganan Mundial Amistoso di Rusia versus Weganan Olimpico na Francia
*Inicio di Guera Mundial di Putin lo ta riba tereno di deporte
*Presidente Macron a basha azeta riba candela di guera mundial
ORANJESTAD(AAN)—Cuatro aña pasa, ora e Coronavirus nobo a haci su entrada na planeta Tera, calculacionnan a wordo haci cuanto tempo lo a tuma pa mundo bolbe na su normalidad.
Kico realmente ta normalidad, no a haya contenido directo den un situacion mundial, cu ya tabata basta aleha for di normanan di normalidad.
Despues di Covid-19, mundo a deshaci pa un gran parti di tapaboca pero tambe di bril di e metal invisibel, cu ta un estorbo pa hende reconoce realidad mundial.
E pandemia Covid-19 a topa cu un mundo cu a dicidi cu petroleo mester wordo geschrap durante e Conferencia di Clima, cu sin duda a ilustra cu ta stroba hende biba cu realidad.
No a tarda mucho, pa prijs di petroleo a subi manera fli den biento y mundo a cay den un recesion y e realidad di un Rusia, cu na 2014 a anexa Crimea pa despues reclama Ukraine den e restablecimento di e Imperio Ruso, den cual aparentemente Vladimir Putin, mester bira emperador comunista.
Den e agenda mundial, cu a tene su mes mas y mas na plannan di economia, cu mester a culmina na 2025, no a tene na consideracion e anhelo di Putin pa expansion.
Na 2024, mundo ta prepara pa Weganan Olimpico na Francia, den un situacion mundial cu sigur no ta papia di fraternidad pero sigur na Maart 2024, ta duna prueba di confrontacion abierto.
Ironicamente, weganan Olimpico ta tuma lugar na Francia, pais goberna pa Emmanuel Macron cu a splica Vladimir Putin, cu Europa por contesta mas agresion militar di Rusia.
E contesta di Vladimir Putin tabata, cu tropanan Europeo cu bay Ukraine, lo topa cu e derota di Napoleon Bonaparte na 1812 como inicio di Guera Mundial.
Macron a bisa cu no tin nada acorda riba e tereno aki di parti di otro paisnan uni den Europa.
Mientras situacionnan serio ta bira realidad na mundo, na Francia preparacionnan ta tuma lugar pa e Weganan Olimpico cu lo haya nan inicio di 26 di Juli pa 11 di Augustus 2024.
Na e momento cu miles di atleta cu ta reuni di paisnan rond mundo, lo haci nan entrada riba boto riba e riu Seine den direccion di e Tore di Eiffel, atletanan di Rusia y Belaruse lo no por ta presente.
Manera DIARIO a anuncia for di 2023, e desaroyonan na Ukraine, a haci cu a scrap nan participacion na e ceremonia inicial di Weganan Olimpico.
Nan lo por trece e banderanan di Rusia y Belaruse den e stadion, manera lo ta e caso cu representantenan di otro paisnan participante.
E tendencia mundial pa e dos paisnan no ta representa na e Weganan Olimpico.
Den historia mundial, na seis occasion ya tabata tin boycot di participacion di paisnan na e weganan cu mester uni mundo, pero continuamente a duna prueba, cu paz mundial ta keda un ilusion pa e ser humano.
Weganan Olimpico a wordo uza como prueba di dolor na mundo, manera tabata e caso ora na 1936 Hitler a transforma e weganan den su propaganda pa su plannan contra humanidad.
Na 1984 Union Sovietico y ocho otro pais socialista a boycot e weganan di verano Olimpico na Los Angeles.
Rusia a introduci su alternativa pa Wega Olimpico cu tabata e Weganan amistoso, cu a bira conoci como e encuentronan di e paisnan Comunista.
Historia ta ripiti na 2024 na momento cu Rusia a anuncia cu e Weganan Olimpico lo wordo sigui pa e Weganan di Amistad cu e lo organisa.
Di su banda, e Comite Olimpico a pidi mundialmente pa boycot e intento di Rusia pa influencia Weganan Olimpico cu e evento cu lo cuminsa algun siman despues di e Weganan Olimpico na Paris.
Manera DIARIO a splica a hopi ocasion, conflicto mundial mester wordo vigila ya cu no solamente e por influencia un mundo cu problema serio riba tereno di clima.
Na 2024 e Weganan Olimpico lo no duna solamente prueba di union y solidaridad, pero lo entrega na mundo prueba di conflicto mundial serio, cu awor ta alcansa cu mas seriedad cu nunca, hasta nivel deportivo cu tabata trata na uni un mundo, cu for di final di Prome Guera Mundial, nunca a conoce paz real.
