E plafond di gastonan di AZV pa e siguiente añanan ta basa riba esun di aña 2023

​

Director di AZV Ir. Edwin Jacobs a reitera:

ORANJESTAD (AAN) Ir. Edwin Jacobs, Director di AZV, den entrevista cu DIARIO a menciona cu na comienzo di aña 2023, tabata mustra cu AZV lo inicia cu un surplus chikito, pero nan a cera aña cu un surplus di 7 miyon Florin, locual nan a anuncia caba.

Despues, na luna di Februari, tabata tin un reunion importante entre e Colegio di Supervision di CAft, hunto cu Minister di Salud, y den e reunion aki ya e Minister a haya for di AZV cu e 5.5% di e recorte cu tabata aplica na e tarifanan, presupuesto y lumpsum, no ta sostenible mas mirando e recuperacion economico.

“Pasobra no por uza mas e pandemia como motibo pa haci e recorte aki, y mester pensa pa hala atras esaki. Den e reunion cu e College, Minister di Salud Publico a menciona cu e ta pensando den e direccion aki, y College a mustra su preocupacion cu e por tin un impacto grandi riba e gastonan di AZV”, Ir. Jacobs a indica.

El agrega cu Minister, na e momento ey, a duna AZV e tarea cu nan no mag di sobrepasa locual nan a presupuesta pa 2023, pa loke ta trata gastonan na 475 miyon Florin.

Esaki a bira e prome plafond cu a worde poni pa AZV cu no mag di sobrepasa, y esey a bira e forma con nos ta bay traha e siguiente añanan cu e plafond di gastonan.

“Ta sigui 1 di Mei 2023 cu eliminacion di e recorte di 5.5%. Den un conferencia di prensa akinan mes, Minister a anuncia esaki, y a nifica cu e diferente tarifanan a bay back na normalidad, lumpsum a bolbe na normalidad for di entrante 1 di Mei, y esaki tabata tin un impacto riba e fondo di 14.5 miyon Florin”, director di AZV a señala.

El a agrega cu importante ta cu bao auspicio y impulsa pa Minister di Salud Publico, el a trece e dunadornan di cuido hunto, conhuntamente cu Ministerio y tambe AZV pa a cera un acuerdo cu ta worde considera historico, cu yama “Zorg Accord” di Juli 2023. “E sector a delinea, en bista di e demanda cu nos ta premira pa e proximo añanan, e espacio y areanan den e sector di cuido cu lo mester haya atencion inmediato y tambe den termino medio y largo. ‘E Zorg Accord’ aki ta bay bira e base pa nos sigui fortifica nos sector di cuido cu e meta pa nos por sigui cumpli cu e demanda cu nos ta premira cu ta bay tin den nos poblacion, pa loke ta trata servicio di cuido medico”, Edwin Jacobs a relata.