The content originally appeared on:
Diario
Directora di SVGA Els van Homelen:
ORANJESTAD (AAN)—Director General di SVGA, señora Els van Homelen, a reitera den entrevista cu DIARIO, cu e parti cognitive pa alumnonan special ta hopi importante, pero tambe cu e muchanan por expresa nan mes na un manera creativo ta hopi importante.
“Esaki ta un parti di nan desaroyo y mi ta hopi contento cu e aña aki nos por a inclui e programa extra cu e lesnan di juffrouw Tara. Tin mayornan cu tin un tiki miedo cu nan yiu mester bin un scol special, pero e mamanan ta keda impresiona cu kico tur nos ta haci”, Juffrouw van Homelen a señala.
Ora e muchanan ta bin akinan, e mamanan ta wak cu nan yiunan ta florece, ta sinti cu nan yiu ta save aki na scol y cu e ta sigui desaroya.
“Semper nos ta habri pa ricibi mas alumno y mayornan por acerca nos via nos trahado social Gisela Gabriela Polo, pa haya intake y informacion tambe. Mayornan mester pensa kico ta miho pa nan yiu, si e ta pega na un scol regular, mi ta hopi sigur cu e por sinti mucho miho na e scol aki”, Juffrouw van Homelen a subraya.
Juffrouw val Homelen a expresa cu scol ta hopi gradici cu e directora di Directie Onderwijs, cu a yega na acuerdo pa e les di Juffrouw Tara bira algo vast, despues Triple A a haci donacion pa scol cumpra e materialnan, AFAS tambe a yuda pa subsidia e curso, CedeAruba a yuda pa juffrouw Tara haci curso di drama y cu por ehemplo Muchila Creativo y Club Caiquetio a duna les na Centro Man na Obra, pues mas hende a siña e lesnan di drama.
“Dus, nos ta hopi gradici cu tur sponsor pasobra sin nan ayudo nos no por a logra cosnan special. Nos ta haya subsidio pero hopi abao, pa cosnan extra y nobo nos ta depende di ayudo di comunidad”, Juffrouw Els van Homelen, directora di SVGA, a declara.
