The content originally appeared on:
Diario
Parlamentario Alvin Molina, MEP:
*E mes lo duna cara na pueblo!
ORANJESTAD (AAN) – Siguiendo cu su entrevista cu DIARIO tocante Departamento di Infrastructura y Planificacion, Parlamentario Alvin Molina a duna informacion encuanto su encuentro cu e Director Interino di DIP.
“Mi tin cu bisa cu señora Dirks cu ta e director interino, a haci un presentacion amplio, el a presenta hopi cifra di locual ta pasando. Pa menciona algo, el a bisa cu aña pasa a trata mil peticion pa casnan residencial pa pueblo, 1700 otro productonan manera huur, comercial, uitbreiden, y a enfatiza mas riba peticionnan erfpacht, di cual tabata tin 616 na 2023, di cual 108 carta a wordo manda 108 carta cu casonan cu a bira mas fiho, y eigenlijk 70 tereno a wordo duna”, Parlamentario Molina a trece dilanti.
El a agrega cu tambe Dirks a menciona cu pa precario aanvragen, 2023 tabata tin nuebe biaha mas caso a wordo trata compara cu 2022, y 75 mas verkavelings plan a wordo trata. E parlamentario a señala cu a keda palabra cu e director mes lo bay den pueblo, duna cara di e departamento na su clientenan, y splica kico ta pasando den e departamento, kico e mando ta haciendo na e momentonan aki pa mehora e servicio pa pueblo.
“Otro punto cu a bin dilanti y cu mi ta contento cu ta pasando, ta cu e siman aki lo tin un reunion entre DIP y Santa Rosa, pero eigenlijk ta dos aña caba cu mi a entrega e mocion y haci e peticion pa Santa Rosa ora ta trata di huurgrond, pa agricultornan cu kier haci un negoshi na un manera tradicional, of por ta industrial pa Santa Rosa, cu ta e autoridad riba tereno di agricultura, cu sa precis kico tin y kico mester na Aruba, pa nan tin un rol mas grandi pa cu e aangifte di terenonan huurgrond”, Alvin Molina a indica y a bisa cu e lo ta pendiente di e resultado di e reunion.
