MOU firma entre FreeZone y tambe Aruba Ports Authority

Gobierno marca paso importante pa desaroyo di FreeZone na Barcadera

ORANJESTAD (AAN): Minister di Finansa, Asunto Economico y Sector Primario, Geoffrey Wever, hunto cu Minister Wendrick Cicilia y Minister Rene Herdé, a firma e siman aki un Memorandum of Understanding (MOU) entre FreeZone Aruba N.V. (FZA) y Aruba Ports Authority N.V. (APA), marcando un paso importante den e proceso pa modernisa y fortalece FreeZone Aruba y explora e posibilidadnan pa su desaroyo futuro na Barcadera.

   E MOU a wordo firma door di cinco representante: Minister Geoffrey Wever, Minister Wendrick Cicilia, Minister Rene Herde, Director di FreeZone Aruba N.V., Sr. Walter Mosher, y Director di Aruba Ports Authority N.V., Sr. Marc Figaroa. E firma conhunto ta refleha e compromiso y cooperacion entre e ministerionan y organizacionnan involucra pa sigui impulsa e desaroyo di FreeZone Aruba como un instrumento strategico pa crecemento y diversificacion di Aruba su economia.

   E acuerdo ta forma parti di e esfuersonan pa explora e desaroyo di un FreeZone moderno na Barcadera, cual ta un localidad strategico door di su cercania cu e haf di carga.

   Actualmente, mercancia ta wordo transporta di e haf di Barcadera pa FreeZone na Bushiri y posteriormente bek pa Barcadera pa exportacion. Un eventual traslado di FreeZone pa Barcadera lo elimina e transportacion adicional aki, haciendo e operacionnan mas eficiente.

   Ademas, actualmente e facilidadnan di FreeZone Aruba na Bushiri ta completamente ocupa y tin un lista di espera di negoshi interesa. E demanda aki, combina cu e ampliacion di actividadnan permiti den FreeZone desde 1 di januari 2026, ta demonstra e importancia di sigui crea espacio y oportunidad pa desaroyo futuro.

   E cooperacion entre FZA y APA ta un paso importante pa explora con e dos organizacionnan por aprovecha nan respectivo responsabilidadnan, infraestructura y experiencia pa facilita e siguiente fase di desaroyo.

  Durante e ultimo añanan, FreeZone Aruba N.V. a pasa door di un proceso profundo di reorganizacion y profesionalisacion, cu a resulta den un administracion financiero na ordo y dos aña consecutivo di resultado positivo.

Pa Minister Wever, e firma di e MOU ta representa un siguiente paso den e transformacion aki. Despues di pone e fundeshi financiero y administrativo di e organizacion na ordo, instala un Director profesional nobo, y ampliacion di actividadnan permiti den FreeZone desde 1 di januari 2026, e enfoke awor ta riba sigui crea e condicionnan necesario pa crecemento, inversion y modernisacion di su infrastructura.

   “Nos a traha duro pa pone e fundeshi di FreeZone Aruba na ordo. Awor nos ta den un fase unda nos por concentra riba su futuro y riba e oportunidadnan cu nos por crea pa diversifica and desaroya nos economia. E firma di e MOU aki ta un paso importante den e direccion ey. Nos no ta simplemente papia di un posibel cambio di localidad, sino di modernisa nos infrastructura, haci nos operacionnan mas eficiente y crea espacio pa mas negoshi por establece y crece na Aruba,” Minister Wever a expresa.

   E desaroyo aki ta alinea cu e vision di Gabinete AVP- Futuro pa reposiciona FreeZone Aruba como un plataforma competitivo pa comercio, logistica, servicio internacional y inversion, contribuyendo na diversificacion di e economia di Aruba.

   Cu e firma di e MOU, e ministerionan y organizacionnan involucra ta reafirma e importancia di cooperacion institucional pa logra desaroyo economico sostenibel. E acuerdo ta crea un base pa FZA y APA sigui profundisa nan cooperacion y explora e posibilidadnan concreto pa desaroyo di actividadnan di FreeZone na Barcadera.

E siguiente pasonan lo concentra riba e evaluacion di e posibilidadnan di desaroyo, e condicionnan necesario y e coordinacion entre e instancianan involucra, cu e meta di logra un trayectoria structura y responsabel.

   “Mi kier gradici mi colega Minister, Minister Cicilia y Minister Herde, y tambe Director di Free Zone, Sr. Walter Mosher y Director di APA sr. Marc Figaroa, cu nan trabao duro y cooperacion. Cu e paso aki nos ta sigui construi riba e fundeshi cu nos a pone, cu un vision cla pa un FreeZone mas moderno, competitivo y prepara pa futuro” Minister Wever a expresa.