The content originally appeared on:
Diario
Hues ta haya castigo exigi pa Fiscal abao
ORANJESTAD (AAN): E hoben homber J.H. di 19 aña di edad a presenta den Corte pa scucha su sentencia. Algun siman pasa tratamento di e caso a tuma lugar, caminda ta acusa J.H. di intento di mata e homber O.
Hinca cu cuchiu: Segun J.H., O. a bin riba dje den un lugar nocturno y el a coy e cuchiu cu el a haya benta abao y a defende su mes. El a bisa cu el a dal O. pero no a hink’e. Hues a bisa cu O. tabatin un hinca. Hues a bisa cu tin testigo cu a bisa cu e ta amigo di un ruman di J.H.
E tabata cu J.H. na un lugar nocturno. Tabatin un grupo di hende y un hende a bay riba J.H. El a tende O. bisa cu e ta bay tira J.H. Segun J.H., O. tabatin un man hinca den un jacket. Hues a bisa cu e testigo a bisa cu O. tabata zwaai su mannan. E testigo a bisa cu J.H. a dal O. mokete den pecho. Pa loke ta e cuchiu, segun J.H. riba caya banda di un auto el a haya e cuchiu. Hues a mustra cu segun relato di Polis, despues di e pelea, J.H. a tira e cuchiu afor. J.H. a bisa Hues cu e no a usa cuchiu sino a dal O. mokete y a coy un cuchiu benta abao.
Segun J.H., ora e cuchiu a cay, e blade a dobla. Hues a bisa cu tin testigo a bisa cu e no a mira J.H. coy algo for di suela. Un otro testigo a bisa cu el a scucha O. bisa J.H. cu e lo bay tir’e y tabatin su man den jacket. El a bisa tambe cu e no a mira cuchiu riba suela. Hues a bisa cu por bien ta cu e cuchiu aki a worde dobla di tal manera pa dal cu mokete y e pida blade ta hinca. J.H. a bisa cu e no sa nada di esey.
Hues a bisa cu e testigonan ta bisa cu J.H. a dal O. mokete y despues a coy cuchiu for di suela. Hues ta haya cu por bien ta cu J.H. a usa esaki y despues a coy esaki for di e suela. Esaki tur ta cuadra cu e scenario cu a sosode. J.H. a bisa Hues cu e no a usa e cuchiu sino su mokete.
J.H. a bisa Hues cu el a sali for di e lugar cu e cuchiu y ora el a mira Polis, el a tira esaki den mondi.
Hues a mustra cu Fiscal a exigi tambe pa ehecuta castigo condicional pa violencia den publico. No mucho tempo pasa, J.H. a haya castigo pa a hinca un hende y awor ta atrobe den Corte como sospechoso di hinca. Segun J.H. e tabata envolvi den un caso pero no cu ta el a hinca.
Fiscal: Fiscal a bisa Hues cu 29 Juli 2023 J.H. y O. tabata na un lugar noctorno. For declaracion di testigonan y O. ta mustra cu J.H. a dal O. un mokete. J.H. a declara cu el a coy un cuchiu for di suela. Polis a bisa cu a mira J.H. cu algo cu ta briya. Despues a haya un cuchiu. O. a bay cerca Polis y bisa cu el a worde hinca door di J.H. na su schouder. J.H. a desmenti di a hinca O. cu cuchiu pero ta bisa cu el a coy e cuchiu for di suela. Polis a mira J.H. cu e cuchiu den su man. Fiscal ta haya cu por demostra cu J.H. a hinca O. cu un cuchiu. E ta haya J.H. culpabel di a purba causa herida severo.
Ta asina cu durante tratamento di e caso O. a presenta pero no kier haci demanda di daño. O. tambe ta encarcela pero pa un otro caso. Despues el a bay back.
Fiscal a bisa cu no tin suficiente informacion si ta trata di un herida severo y cuanto tempo a dura pa O. a cura. Fiscal ta haya J.H. culpable di maltrato cu arma. Ta un caso serio. Esaki ta causa inseguridad den comunidad. Den un lugar publico esaki a sosode. Fiscal a mustra cu J.H. tin carchi di castigo y 17 Maart 2023 a condena J.H. pa violencia publico y awor a haci delito den su tempo di prueba. Fiscal ta preocupa cu J.H. no a siña. Fiscal ta haya cu J.H. mester sigui curso pa controla su agresion. Fiscal a exigi 9 luna di prison di cual 3 luna ta condicional, cu condicion cu J.H. ta cay bou guia di Reclassering cu 2 aña di prueba. Tambe Fiscal a exigi pa pone riba e castigo, e 3 luna di prueba condicional.
Abogado: Abogado mr. Ras a bisa cu despues di e incidente Augustus 2022, a sigui problema door di gang di O. di Madiki. A tira dilanti cas di J.H. y tambe rasca auto di J.H. su mama. E abogado a bisa Hues cu aña pasa e gang di O. a bay na trabao di J.H. y menaza. Polis a bay pa para e asunto aki. Na opinion di e abogado, tur esaki a causa loke a sosode na e lugar nocturno. O. a cana bay riba J.H. y bisa cu awe lo bay tir’e. J.H. a sinti su mesa menaza mirando cu O. tabatin un man den su jacket. J.H. tabata spanta y a puntra O. kico a pasa.
A surgi un discusion y e momento ey J.H. a dal O. un mokete na su schouder. Segun e abogado mr. Ras, e momento ey Polis a yega y a detene J.H. E momento ey O. no a bay papia cu Polis. Ta casi un ora despues, el a bay bisa un otro patruya di Polis cu el a worde hinca.
E abogado ta kere cu O., a bay sconde e arma y despues a bay cerca Polis. E abogado a mustra Hues con riba media O. ta broma cu arma di candela. O. no a kier a haci denuncia contra J.H. Esaki ta mustra cu O. mes kier regla cuenta cu J.H. E abogado no ta haya cu J.H. a maltrata O. cu cuchiu. E no tabatin intension pa haci esaki. El a djis dal O. un mokete. Ningun hende a bisa cu a mira J.H. cu un cuchiu den man ora a dal O.
Abogado a mustra cu Polis no a haci investigacion riba e cuchiu si tin mancha di sanger of DNA. No tin mancha di sanger riba e cuchiu. E abogado ta haya cu Polis no a haci suficiente investigacion pa determina si realmente ta J.H. culpable of no. El a mustra cu Polis no a pidi imagen di video di seguridad pa mira kico realmente a pasa.
Na opinion di abogado, no por papia di intencional a hinca. E abogado ta haya cu aki por papia cu J.H. a actua den defensa propio ora cu O. a bis’e cu awe si ta bay tir’e. Abogado ta haya cu no mester castiga J.H. Abogado mr. Lotterhoman a bisa Hues cu J.H. na momento cu el a worde deteni, a pidi pa check video y scucha testigonan. Ningun hende a mira J.H. cu un cuchiu den man.
Abogado a mustra cu O. tambe ta sera den KIA y amigonan di O. ta menaza J.H. Actualmente J.H. ta isola pa evita cu e ta worde ataca.
Sentencia: Recien Hues a dicta sentencia caminda Hues a bisa cu a keda legalmente proba cu J.H. a hinca O., cu cuchiu na braza. Hues a reacciona riba defensa cu e cuchiu a worde haya riba suela. Hues a bisa cu e no ta kere esaki. Hues ta kere cu e cuchiu a worde traha pa por tene den mokete y asina dal O. Hues tambe a rechaza cu no ta J.H. a hinca y tambe a rechaza e defensa propio. Hues tampoco a acepta cu J.H. a worde menaza. Hues a bisa cu e no ta haya cu J.H. a worde menaza door di O, y cu e mester a defende su mes.
Pa cu e castigo, Hues a bisa cu e ta tene cuenta cu seriedad di e caso. Hues a bisa cu J.H. a causa sentimento di inseguridad. Tambe Hues a tene cuenta cu J.H. a yega di worde condena caba pa maltrato. Hues ta haya e exigencia di Fiscal no suficiente. Hues a condena J.H. na 12 luna luna di prison, di cual 4 luna ta condicional cu 2 aña di prueba. Esaki bou guia di Reclassering. Ademas Hues a pone riba e castigo, e castigo condicional di 3 luna pasobra J.H. a haci otro delito den su tempo di prueba.
