The content originally appeared on:
Diario
Edgar Vrolijk, Presidente di Parlamento
*Un di e temanan di e ‘Contact Plan ta esun di Agricultura
ORANJESTAD (AAN): Presidente di Parlamento, Edgar Vrolijk a duna un declaracion di loke tabata e reunion di contacto entre e parlamentarionan di Aruba, Corsou, Sint Maarten y Surinam cual a tuma lugar dialuna ultimo.
El a indica cu esaki tabata un reunion di ‘contactplan’ cu desde 2009 a cuminsa cu ne y e tin di haber cu e historia den Reino hunto cu Surinam, Corsou, Sint Maarten y Aruba.
Un di e puntonan cu kier a trece dilanti ta agricultura cual ta un tema di vital importancia pa futuro y sigur pa e pueblo di Aruba, a bisa.
Vrolijk a agrega cu Surinam ta bon den e tema aki di agricultura y dialuna hunto cu e minister corespondiente di Aruba lo ta den dialogo y lo duna su presentacion pa wak con por yega na otro mirando e historia di cada pais, pero tambe e posibilidadnan pa por explora y saca probecho di e agricultura di Surinam.
Mayoria di e cosnan cu por sosode ta mara na acuerdonan entre e gobiernonan. Mester inicia un caminda y den esey Parlamento ta hunga un rol importante esaki pa no solamente trece parlamentonan hunto, pero pa por gobierno por bay den contacto cu gobierno di Surinam, a enfatisa.
Ta conoci cu Aruba tabata tin basta contacto cu Surinam. Minister Wever tin un plan y e tabata den Sala di Parlamento elaborando riba esaki.
Parlamento den cuadro di esaki ta haci un proceso di siguimento cu Gobierno. Nan no por dicidi pa Gobierno pero ta keda encurasha gobierno pa yega na acuerdonan cu ta di beneficio pa Ariba, Vrolijk a expresa.
