The content originally appeared on:
Diario
Prome Minister ta priminti solucion pronto
Bubali Plas tin prioridad di Gobierno y sector priva
ORANJESTAD(AAN): Prome Minister Evelyn Wever Croes Dialuna a papia di e situacion di e Rioolwaterzuiveringsinstallatie (RWZI), durante un conferencia di prensa di Gobierno.
El a splica cu esaki ta un tema cu ya pa basta tempo tin e prioridad number 1 no solamente den Gobierno, sino tambe den sector priva, specialmente e sector turistico.
“Nos ta mira cu e problemanan rond di e RWZI ya bira cada biaha mas grandi”.
Nos a tuma un decision ya for di dia cu nos a drenta den Gobierno via gabinete Wever Croes 2, cu nos ta bay busca un solucion mas drastico.
Esaki mirando cu den gabinete Wever Croes 1 nos a purba diferente alternativa cu no a funciona.
Pues den gabinete number 2, a pone esaki den man di minister di Naturaleza Ursell Arends y minister Glenbert Croes y hunto a bin cu e proposicion na ministerraad,pa privatiza e planta di RWZI y den e cuadro aki Utilities Aruba a indica cu e tin interes pa tuma over e planta y asina por bay traha mas riba genera energia alternativo, segun e Prome Minister.
El a splica tambe e necesidad pa privatiza RWZI.
Segun Wever Croes, practicamente tur Gobierno di Aruba pa hopi aña no tabata por a haci e inversionnan necesario den e planta aki y no por a garantiza inversionnan structural den e planta debi na problemanan financiero y sigur durante e pandemia.
Segun e mandatario, e placa mester a wordo inverti den cierto otro prioridad otro momento, por ehempel pa scapa bida di hende durante e pandemia.
“E falta di inversion durante hopi tempo cu mester a tuma lugar, a pone e planta den un estado hopi critico”.
Ora cu porfin nos tabata tin e posibilidad pa acumula fondonan y pone nan un banda pa haci inversion, pa motibo di e normanan y supervision financiero, nos no por a haci inversionnan tampoco, segun Wever Croes, kende a sigui bisa cu e ora Gobierno a yega na e conclusion cu ta mihor pa privatiza e planta y pase den man di un entidad estatal cu si tin e forza y posibilidad pa busca financiamento pa por traha un planta nobo.
Prome Minister a sigui bisa cu un planta nobo ta costa hopi placa y cu Gobierno no tin e placa ey.
“Ni kico nos haci nos no ta yega na e placa ey y e normanan financiero cu pais Aruba tin awor, ta prohibi nos pa presta placa pa inverti den un proyecto asina grandi”.
Pues den e caso aki nos ta privatiza e planta, esaki ta bay over na Utilities, e tin un balor, e ta bay over cu e incineratornan tambe cu tambe tin un balor y e ta bay over tambe cu henter e sistema di riolering cu tin.
E tin un balor y e tin un ‘liability’ tambe, pasobra pa hopi tempo esey no a wordo mantene tampoco, segun e mandatario.
El a splica cu tur esaki ta bay wordo incorpora den un ‘dochtermaatschappij’ di Utilities.
Gobierno tin cu paga e compania pa haci e trabao y pa financia esaki lo bin un aumento chikito den e asina yama ‘Environmental Levy’, cu ta un tipo di impuesto cu ta wordo cobra via e turistanan cu ta bishita nos isla.
Contribucion na medio ambiente ta hustamente e meta di e impuesto aki cu turistanan ta paga.
“E ley ta bay wordo trata den Parlamento y cu esaki ta bin un solucion definitivo pa e RWZI”, segun Wever Croes.
