Dia 15 di september ta celebra Dia Internacional di Democracia

Parlamentario Evelyn Wever-Croes

ORANJESTAD (AAN):  Dia 15 di September ta fecha conmemorativo di Dia di Democracia. Pero democracia no ta solamente vota cada 4 aña. Democracia ta respeta e bos di pueblo, e derecho di oposicion, e estado di derecho y e papel esencial di Parlamento. 

Un Parlamento fuerte ta un pilar di un democracia fuerte. E Parlamento mester por cuestiona, controla y exigi transparencia di  gobierno. E mester tin espacio pa debati, pa haci pregunta y pa cuestiona, pasobra control parlamentario no ta un obstaculo pa goberna. E ta un garantia pa bon gobernacion. 

Ora preguntanan di parlamentarionan no ta wordo contesta, ora reunionnan publico no ta wordo yama, ora oposicion no ta wordo duna e espacio pa haci su trabou constitucional, nos no ta debilita solamente e Parlamento. Nos ta debilita democracia. 

Democracia ta fuerte ora poder tin contrapeso. Ora gobierno ta rindi cuenta. Ora e bos di pueblo ta wordo scucha. Y ora diferente opinion por existi sin miedo. 

Awe mi ta celebra democracia, pero tambe mi ta reafirma mi compromiso pa defend’e. Pasobra democracia no ta un regalo.

E ta un responsabilidad.

E ta un derecho.

Y e ta nos deber pa proteh’e.

Un Parlamento fuerte, ta haci Aruba mas fuerte.