Aruba kier fia 941 miyon pa paga debenan bieu

Ministro Wever a confirma di ta acercando mercado internacional

• Debenan aki lo madura den 2027
• Ministro kier informa y prepara pa financiamento 

ORANJESTAD (AAN): Minister di Finansa, Asunto Economico y Sector Primario, Geoffrey Wever, lo participa na Private Placements Industry Forum Europe 2026 (PPIF-Europe) na Amsterdam, Hulanda, como parti di e strategia di Gobierno pa fortalece relacionnan cu inversionistanan internacional y prepara mercado pa e necesidad di financiamento pa paga debenan di pasado di Aruba di Afl. 941 miyon.

  Pa cubri e necesidad di financiamento di Afl. 941 miyon pa paga debenan bieu, Gobierno tin un strategia financiero concreto. Un parti di e suma aki lo wordo paga cu e Afl. 84 miyon di surplus, mientras cu pa e suma restante Gobierno ta prepara un combinacion di refinanciamento cerca institucionnan financiero local y inversionistanan internacional. Ta precisamente den e contexto aki Minister Wever ta na Europa pa acerca inversionistanan, fortalece relacionnan existente y busca e condicionnan mas beneficioso pa Aruba.

   Refinancia debe existente na un mihor prijs y bou condicionnan mas faborabel ta forma parti di e strategia pa baha peso financiero di pais y sigui reduci e debt-to-GDP ratio, cu segun proyeccion lo yega na 59% pa final di 2027. Asina Gobierno ta uza e posicion financiero mas fuerte di Aruba pa maneha debenan bieu di forma strategico, baha costo unda ta posibel y fortalece sostenibilidad di finansa publico pa largo plazo.

   E PPIF-Europe 2026 lo tuma luga riba 15 y 16 di september y ta reuni un cantidad significativo di inversionistanan institucional internacional. Pa Aruba, e plataforma aki ta ofrece un oportunidad importante pa amplia su base di inversionista, fortalece relacionnan existente y intercambia informacion di mercado cu por ta relevante pa futuro posibilidadnan di financiamento.

   E participacion di Minister Wever no ta simplemente pa presenta na un conferencia financiero. E ta forma parti di un proceso proactivo di preparacion. Cu un necesidad di financiamento di mas cu Afl. 900 miyon, Aruba ta traha delanta pa mantene contacto directo cu mercado, presenta su perspectiva economico y fiscal y crea e base pa un proceso di financiamento mas amplio y competitivo.

   E programa ta consisti di un serie di reunionnan directo cu inversionistanan institucional existente y potencial lo inclui reunionnan individual, discusionnan den grupo chikito, cu e obhetivo di duna mercado un actualisacion tocante perspectiva economico di Aruba, strategia fiscal, prioridadnan di financiamento y plannan di desaroyo a largo plazo. Na mes momento , Gobierno lo ricibi feedback directo for di mercado internacional.

   “Pa un necesidad di re-financiamento di debenan di pasado di Afl. 941 miyon, Aruba no ta bay mercado sin ta bon prepara. Nos ta prepara mercado proactivamente, fortalece confianza den Aruba y amplia nos base di inversionista, pa crea e condicionnan mas faborabel posibel pa pais,” Minister Wever a indica.

   Durante e ultimo añanan, Aruba a traha consistentemente riba un posicion mas fuerte cerca inversionistanan internacional. E strategia ta basa no solamente riba presenta cifranan financiero, sino tambe riba construi relacionnan duradero, mantene comunicacion constante y percura pa inversionistanan compronde direccion economico y fiscal di pais.

   E participacion na PPIF-Europe 2026 ta continua cu e direccion cu a inicia anteriormente na PPIF-Europe na 2025 y PPIF Miami anteriormente den 2026. E meta ta pa inversionistanan sigui e desaroyo economico y financiero di Aruba durante henter e periodo y no tende di Aruba solamente na momento cu pais tin necesidad di financiamento. Asina, ora Aruba acreca mercado, inversionistanan ya tin conocemento di e credito Arubano, e direccion di maneho y e resultado di e maneho financiero.

   Un otro elemento importante ta diversificacion. E base di inversionistanan di Aruba tradicionalmente tin un presencia fuerte den mercado Mericano. Gobierno ta sigui traha pa amplia e presencia aki tambe den Europa, pa Aruba no depende excesivamente di un solo mercado y pa por crea mas espacio pa competencia entre fuente di capital. Minister Wever a enfatisa cu e strategia aki ta parti di un maneho financiero responsabel.

   “Preparacion, confianza y diversificacion ta esencial. Nos responsabilidad ta pa crea e mihor posicion posibel pa Aruba prome cu nos subi mercado. Esaki ta con nos ta proteha interes di pais y maneha finansa publico cu disciplina,” Minister Wever a indica.

   Cu e paso aki, Gobierno di Aruba ta manda e señal cla na mercado internacional, cu  Aruba ta prepara su mes na tempo, ta mantene dialogo cu inversionistanan y ta traha strategicamente pa garantiza cu necesidadnan di financiamento den futuro por wordo maneha for di un posicion mas fuerte, mas diversifica y mas competitivo.