Cu nan 45 aña como porta di entrada pa progreso di Aruba

Xiomara Maduro ta felicita APA

ORANJESTAD (AAN): Cu gran aprecio Parlamemtario Xiomara Maduro ta felicita Aruba Ports Authority N.V. (APA) cu su 45 aniversario di existencia. Desde su fundacion na 1981, APA a cumpli un papel indispensabel den desaroyo economico y logistico di nos isla.

   Durante e añanan, APA a crece y modernisa su operacionnan, manteniendo e wafnan di Oranjestad y Barcadera sigur, accesibel y eficiente. Via nos haf, productonan esencial ta drenta Aruba, turista di crucero ta bishita nos isla y conexionnan comercial cu resto di mundo ta keda garantisa.

   Logronan importante:  Entre e logronan importante por menciona:

(*) E rehabilitacion y desaroyo di waf di Barcadera, caminda APA a crea un terminal moderno pa atende container, vehiculo, material di construccion y otro tipo di carga.

(*) E traspaso di operacionnan di carga for di Oranjestad pa Barcadera, un proyecto grandi cu a crea mas espacio pa desaroya turismo di crucero y e waterfront di Oranjestad.

(*) E crecemento di turismo di crucero. Na 2019, prome cu pandemia, Aruba a ricibi mas cu 832.000 pasahero di crucero, ilustrando e importancia di nos waf pa economia y sector turistico.

(*) E implementacion di normanan internacional di siguridad y vigilancia continuo di e areanan portuario.

(*) E adopcion di un “Green Port Policy”, cu ta integra proteccion ambiental, reduccion di contaminacion y uzo responsabel di recurso den desaroyo portuario.

(*) E desaroyo di Barcadera Business Park, cu ta crea oportunidad pa logistica, almacenamento, industria chikito y diversificacion economico.

   Tras di cada un di e logronan aki tin hende!  Pues empleadonan cu experiencia, conocemento, y sentido di responsabilidad, cu tur dia ta percura pa Aruba su porta maritimo sigui funciona. Nan trabao hopi biaha ta sosode for di bista publico, pero su impacto bo ta sinti den henter nos economia y bida diario.

   Hunto cu coleganan di Fraccion di MEP, nos tabata tin e placer di asisti na e recepcion pa conmemora e momento historico aki. Tabata un bon oportunidad pa reflexiona riba e caminda cu APA a recore y pa reconoce tur esnan cu, durante diferente generacion, a contribui na su crecemento.

   Na directiva, Conseho di Comisario, empleadonan actual, ex-empleadonan y tur partner di APA, Parlamentario Maduro a bisa: “Pabien cu 45 aña di servicio na bienestar di Aruba.  Cu e mesun dedicacion, profesionalismo y vision, ta desea APA hopi mas aña di progreso, inovacion, y contribucion na bienestar di nos pais.”