The content originally appeared on:
Diario
ORANJESTAD (AAN): Swift Distribution e aña aki ta partner cu Cas di Cultura (CdC) pa e gran evento di Pride on Stage cu ta bay tuma lugar Diasabra dia 8 di Juni.
Durante un conferencia di prensa Mitch Almary, marketing manager di Swift Distribution Aruba, a bisa cu e compania ta hopi contento di ta partner cu Cas di Cultura.
“Sigur nos ta sostene e comunidad grandemente y nos ta partner den e evento aki sigur cu nos biñanan, muy en particular e Alberto Nani Prosecco”.
Prosecco ta e bebida di momento y Alberto Nani ta bay ta parti di e evento aki den gran forma, segun Almary.
El a sigui bisa cu ta bay tin un photo booth increibel cu bo no kier perde.
“Bo no kier perde e show, pero bo no kier perde saca potret den e photo booth aki”.
E evento aki no ta solamente drenta den e sala e wak e show.
Di ora cu bo yega den e foyer, ya caba ta bay tin ambiente, DJ, bebidanan na bar y pa e biaha aki ta bay wordo permiti di hiba bo bebida cu bo den e sala.
Normalmente esey no ta permiti na Cas di Cultura, pero pa e evento special aki si tur hende por drenta e sala principal cu nan bebida, segun Almary.
El a sigui bisa cu despues cu e show termina e anochi no a caba pasobra den e foyer ta bay tin Dj’s, mientras cu tur hende por sigui have fun, topa otro, combersa y pasa ratonan ameno.
Ta bay tin un ‘after party’ tambe despues na Cage.
Riba e anochi, pa e prome 50 personanan cu yega Cas di Cultura pa Pride on Stage ta haya un regalo special di Swift Distribution.
