The content originally appeared on:
Diario
Empresario por acepta tram y brug como borg pa debe di cliente?
E ciclo di maneho di Mike Eman ta cera cu acuerdo cu Hulanda
Suelo di Aruba a bira negoshi pa algun y debe a bira peso pa tur
ORANJESTAD (AAN) Ya por nota den mundo politico cu eleccion ta acerca. Sinembargo, den e eleccion aki Aruba ta wordo acompaña pa e resultadonan di uno di e epocanan cu mas prueba a entrega di loke politica por haci cu un pais.
Por bisa cu awe un ciclo cu a cuminsa na 2009 ta cera den salanan di Corte di Husticia na Aruba pero tambe na e mesa di negociacion entre Reino Hulandes y Aruba pa mira con Reino ta haci uzo di su deber sagrado pa segura bienestar di e Arubiano.
Pa comprende e peso di e acuerdo cu Gobierno Wever-Croes mester a alcansa cu Reino Hulandes, mester bolbe directamente na e Arubiano, cu ta ciudadano di Reino Hulandes cu tin un responsabilidad legal pa sigura bienestar di e Arubiano.
No ta solamente den asunto di placa, pero riba tur tereno, Reino Hulandes mester mira e bienestar di e Arubiano.
Ta e deber aki a haci cu Reino Hulandes a interveni na 2014, pa pone un fin na e drama gubernamental cu a haya su inicio na Aruba na 2009, ora un Aruba ciego pa ilusion y fantasia cu cual el a wordo yena, a vota pa Mike Eman bira Ministro Presidente.
E placa cu e Arubiano mester pa e por cumpra su pan di cada dia, a wordo pone na peligro dor di Gobierno di Mike Eman, cu na un forma cruel a hinca Aruba den un aventura cu mester a produci su persona estadia eterno riba e stul di Ministro Presidente di Aruba.
Cu placa di belasting di Pueblo, Mike Eman a sostene su fantasia y ilusion di ta un Rey, cu contra tur ley a hiba un maneho cu a destrui bienestar di e Arubiano, cu a keda atras cu e deber pa awe paga belasting y paga tur debe, cu Mike a introduci manera e mes a bisa orguyosamente.
Aruba na e momento aki a yega na un acuerdo cu Hulanda con e ta bay paga e debenan cu e tin cu Hulanda, cu originalmente a exigi pa Aruba entrega su autonomia na Reino, loke finalmente no ta sostene pasobra Aruba ta dicidi hunto cu Reino con contenido lo wordo duna na e poder di Reino, pa evita cu abuso ta wordo haci dor di politiconan Arubano contra Pueblo di Aruba.
Aruba, representa actualmente pa Gobierno Evelyn Wever den e negociacionnan cu Hulanda, a alcansa un acuerdo cu Reino Hulandes pa evita ripiticion di e drama cu Aruba a conoce, for di momento cu Hulanda a pone fin na e maneho financiero destructor di Gobierno Mike Eman, cu a zink autonomia y a exigi entrada di supervision Hulandes.
Aruba ta na caminda pa eleccion den un situacion unico y hasta historico.
Ministronan di Gabinete Mike Eman ta wordo sentencia na castigo di prison. Mike Eman ni sikiera ta splica, pakico e no por a ripara, kico tabata pasa den su Gabinete.
Na mes momento, Gobierno Evelyn Wever-Croes mester yega na un acuerdo cu Reino pa atende cu e desastre financiero cu Gobierno Mike Eman a laga atras y ta nifica cu e Arubianonan di awe mester kita pan di nan boca, electricidad cu nan lo uza pa deshaci di calor, dak cu nan lo por construi riba nan cabez contra solo, pa paga belasting a base di loke Mike Eman a laga como herencia di su gobernacion na Aruba.
Na e momentonan aki e pregunta con Mike Eman a atende cu bienestar di Aruba, sigur mester haya un contesta pa e Pueblo cu lo keda pa basta tempo victima di su maneho abusivo.
Mike Eman mester bin splica e Arubiano con e por bende tram y brug, cu a exigi tanto placa di Pueblo, pa pone placa den caha di Aruba.
Un empresario lo acepta tram y brug como pago di debe? Infrastructura importante manera ducto pa awa sushi produci pa crecemento di turismo, a keda atras.
Kico ta democracia? Kico ta un Gobierno pa Pueblo, haciendo uzo di placa di Pueblo? Acaso e ta un Gobierno cu ta laga atras pa generacionnan cu ta bini, un debe nacional y belasting pa paga?
Acaso e ta un Gobierno marca pa abuso di placa di Pueblo na tur forma?
Tur e preguntanan aki ta uni den un solo pregunta. Con Mike Eman kier presenta su mes como dirigente di Aruba, cu su Gobierno a trata na zink riba tur tereno?
