Proyecto cu meta pa haci uzo di e poder di investigacion artistico pa husticia climatico

Proyecto nobo ‘Just Art’

ORANJESTAD (AAN): Universidad di Aruba ta orguyoso di anuncia e lansamento di JUST ART, un iniciativa di

investigacion di seis aña pa henter Reino, financia pa e Conseho Hulandes di Investigacion (NWO) y lidera pa Profesor Ann-Sophie Lehman na Universidad di Groningen. E proyecto ta uni artista, investigador, activista y comunidadnan rond di Aruba, Corsou, St. Maarten, e islanan BES y Hulanda Europeo pa explora con practicanan artistico por avansa husticia climatico, garantisando cu e hendenan cu ta mas afecta pa cambio di clima ta wordo trata di un manera husto, tin un bos fuerte den decisionnan, y ta ricibi e sosten cu nan tin mester pa keda den siguridad y prospera.

   Dr. Salys Sultan di Universidad di Aruba a enfatisa cu cambio di clima no ta solamente un reto cientifico o di politica, sino un reto profundamente humano. “Dato so no ta pone hende move,” el a remarca. “Arte por habri espacionan emocional y di imaginacion pa comunidadnan mira nan mes den e transicion y pa tuma accion.”

   Just Art ta enfoca riba con investigacion artistico (for di arte visual te cu arte di escenario, contamento di historia, y diseño basa riba comunidad) por yuda comunidadnan maneha e retonan di bay over pa un cambio husto y sostenibel. E contribucion di Aruba lo centra riba conocemento local, patrimonio cultural, y enfokenan impulsa pa comunidad pa resiliencia climatico.

   E proyecto a lansa den januari 2026 y lo desaroya su mes a traves di varios tema y topico di investigacion, incluyendo uno cu ta wordo co-coordina na Aruba. Actividadnan lo inclui residencia artistico, taller publico, dialogo comunitario, y investigacion colaborativo cu socionan local. Esaki lo wordo facilita pa un investigador di PhD di Universidad di Aruba y miembronan di comunidad.

   Universidad ta spera cu anhelo pa traha cu artista, educador, formulador di politica, y organisacionnan comunitario pa sigura cu e bos y experiencia di Aruba ta duna forma na e conversacion mas amplio den Reino tocante husticia climatico.

   Pa mas informacion, bishita www.justart.info y por si acaso bo tin algun pregunta o kier sa mas tocante e proyecto, bo por tuma contacto cu Salys na This email address is being protected from spambots. You need JavaScript enabled to view it..