The content originally appeared on:
Diario
Ministro Geoffrey Wever:
ORANJESTAD (AAN): Den un workshop interactivo dirigi pa Rudolf van der Berg riba 3 di april 2024, e adviesbureau Stratix a duna un splicacion riba su conseho pa un modelo revisa di compensacion pa uzo di frecuencianan 5G na Aruba. E modelo aki, diseña pa stimula uzo y desaroyo economico den e epoca di 5G, a hala atencion di stakeholders for di varios sector. E conseho a ser redacta na encargo di Minister Geoffrey Wever y Directie Telecommunicatiezaken.
E participantenan, consistiendo di representantenan di e sector di telecomunicacion, institucionnan gubernamental y no-gubernamental, manera APA NV, ATIA, NV Elmar, WEB Aruba NV, AAA NV, KPA, Guarda Nos Costa, a ricibi un splicacion detaya riba e conseho desaroya pa Stratix. E modelo di compensacion proponi ta busca un balansa entre compensacion/cobransa husto pa e uzo y e stimulacion di inversionnan necesario den infrastructura manera antena y rednan.
E acercamento aki ta duna respuesta na e retonan di e sistema actual di compensacion di spectrum cu ta data di 2002 y cu no a ser cambia desde e tempo ey. E modelo aki ta haci’e caro pa proveedornan pa implementa frecuencianan adicional pa logra velocidadnan mas halto y miho cobertura. Stratix ta subraya e importancia di un modelo cu por sostene inovacion y desaroyo den e mercado di telecom, cual lo conduci na internet mobil mas rapido.
Cu e conseho, Stratix ta propone un suma fiho como compensacion anual, independiente di e cantidad di e spectrum cu ta ser uza. Esaki ta haci e modelo mas accesibel y inclusivo, motivando tanto proveedornan nobo como esnan existente pa maximalisa uzo di e spectrum y asina alcansa e maximo amplitud di celular y cobertura posibel, dentro di cuadro internacionalmente estableci.
E workshop a ser organiza pa promove un dialogo constructivo y consultacion cu stakeholders promer cu tuma un decision. Nan reaccion y comentario ta di importancia critico y lo ser tuma na cuenta den un modelo nobo di compensacion. Esaki lo forma un paso fundamental den e formulacion di futuro maneho y conexion mobil na Aruba.
