Cifranan di turismo ta mustra cu e crecemento mas grandi e ultimo añanan ta bin di e sector “Vacation Rental”

​

CEO DI AHATA, Tisa LaSorte:

*Eynan tin un crecemento sin ningun plan p’e ta ainda! 

ORANJESTAD (AAN) — Den un entrevista cu DIARIO, señora Tisa LaSorte, CEO di AHATA, a bisa cu si mira e cifranan di turismo e crecemento di mas grandi di e ultimo añanan a bin di e sector di “vacation rental”, y eynan un crecemento ta tumando lugar sin ningun plan p’e te ainda.

LaSorte a splica cu loke por mira tambe den e estadisticanan, ta cu e grado di ocupacion ta solamente 50% of menos. “Esey ta nifica cu bo tin mas inventario caba cu bo tin necesidad p’e, cu bo tin demanda p’e. Dus, enberdad un decision mester wordo tuma, pero tur e decisionnan aki mester tin un vision y un plan integral, cu bo por wak tur elemento di bo turismo, kico nos kier pa nos isla”, CEO di AHATA a expresa.

El a agrega cu mester scucha di nos comunidad, di e inversionistanan cu ta contribui cu economia di nos pais, y loke nos tin cu recorda si, ta cu nos tur ta biba di turismo.

“Na Aruba nos ta biba di turismo, pero loke comunidad ta pidiendo p’e ta pa tin un turismo bon planea, bon regula, y pa e no ta sin control. Eynan bo mester tin e vision pa trece tur stakeholders hunto, incluyendo bo comunidad, y bo ta bin cu un plan pa cada elemento, incluyendo vacation rental, hotel, vehiculo, crusero y vacation rental”, CEO di AHATA a remarca.

See also

Local News

Otro siman Secretario di estado Van Huffelen lo ta na Aruba

El a agrega cu AHATA tin su preocupacion, unda el a menciona tres punto: Uno, si ta tende di mas volumen di inventario na final e balor di cada unit ta baha. Dos, tambe si Aruba crece di mas, bo ta yega na un Aruba cu ta menos agradable pa bishita. Anto, esey por afecta bo turismo, bo economia. E di tres problema ta cu si bo comunidad no ta contento, si no mira cu ta bay den un plan door di un decision cu por ta bon pa Aruba en general, por ta cu e personanan ta bay cuminza actua contra e turista mes.

“Pues, nos ta mira esaki como un problema di nos pais, cu nos pais mester soluciona, nos mester sinta hunto, gobierno mester invita e stakeholders pa bin den e plan, incluiyendo e representantenan di e comunidad, e residentenan”, CEO di AHATA a indica.