Caya Grandi di Aruba nunca lo bira e “Caya Grandi di prome”

Segun comerciante Marjorie Vermeer:

ORANJESTAD (AAN): “Caya Grandi di Aruba nunca lo bira e Caya Grandi di prome”, asina comerciante Marjorie Vermeer a expresa den un entrevista recien. Segun Vermeer, e futuro di Caya Grandi ta den un concepto completamente nobo: un centro atractivo cu un mezcla di algun tienda, arte, espacio publico, muchanan riba caya y luganan pa sinta pafo, disfruta un cuminda of bebida y pasa un rato agradabel y mas na nivel di pueblo en general cu no lo bay sinta cu nan yiunan na un hotel pa haci asina. “Sinembargo, no mester enfoca riba turismo so”, el a expresa.

   “Aworaki no tin un maneho di e caya mes. Loke Prome Minister Mike Eman a haci ta introduci e fiestanan grandi den caya, ‘Ban Bek Caya’, cu mi a tende ta costa alrededor di 200.000 Florin pa cada fiesta pa promove e Arubiano bay caya bek”, Vermeer a remarca.

   El a subraya cu antes ciudadanonan tabata bisti bunita pa bay den caya, pasa den auto cu famia y wak tienda etc. Segun e, awendia e Arubiano no ta bay caya mas pa motibo cu e no tin tempo y tambe pasobra no tin nada den caya. “Nos kier lanta Caya Grandi bek ‘a las buenas o a las malas’,” Vermeer a expresa.

   Gobierno, den intento pa revitalisa Caya Grandi, a bin cu fiesta, cu ambiente, y musica, pero, Vermeen a menciona no ta conoci con e iniciativanan aki a contribui na recuperacion di Caya Grandi.

   El a menciona sinembargo, cu ciudadanonan ta cuminsa bay mas den caya y ta haya mas interes pa inverti. Comerciantenan a uni, inversionistanan grandi a cumpra varios edificio pa renoba y adapta nan pa un concepto nobo principalmente pa atrae turista pa bay den caya. Segun e, esaki ta solamente pa algun tienda di luho, cu, segun e, ta parti di e futuro di nos Caya Grandi.