Camara di Comercio ta hopi positivo pa siguiente Trade Mission na Miami

Martijn Balkestein ta pidi pa futuro exportadornan tuma nota

• Actividad ta dirigi specialmente na comerciantenan den Caribe

ORANJESTAD (AAN): Na luna di November venidero, tin un evento special pa comercio di Caribe, y ta ser organiza na Miami, Florida.

   Drs. Ing. Martijn Balkestein, kende ta President Camara di Comercio, a confirma cu nan ta uno cu ta apoyando y encurashando comerciantenan di Aruba pa acudi na esaki.

   Nan mes ta preparando pa atende e ‘Trade Mission’ na Miami.  E ta ser yama “From Island Roots to Global Routes”, y ademas di Aruba, a nota cu Camara di Comercio di St. Maarten tambe ta uni na esaki.  El a splica cu esaki un biaha mas ta habri porta pa nos localnan y ta uportunidad pa tur empresarionan cu kier extende nan lazonan cu otro pais. Esey den sentido cu nan a start esaki hunto cu Camara di Comercio di St. Maarten, di Corsou, di Bonaire, di Anguilla, St. Martin frances.

   Resultado ta cu lo bay tin hopi comerciante di Caribe cu ta bayendo Miami.  Eynan e ta un chens unico pa promove bo producto of hasta haci uzo di importacion, pero tambe bay over pa exporta.  Tin di corda cu Miami ta wordo considera e ‘gate to America’, unda tin mas di 1.400 multinationals cu ta activo eynan y na Miami.  Ta conoci cu Florida tin hopi habitantenan cu lazonan Caribense, sea cu nan conoce e productonan di Caribe caba.  Fuera di esey, hopi di nos comerciantenan tin productonan cu ta bon, ta wordo consumi local, y tambe dunamento di servicio.  Pasobra segun Balkestein, “servicio” tambe ta importante, pero algun negoshi no tin e moda pa expande esey mas leu cu frontera di e islanan den Caribe debi cu sea nan no tin e network of nan no tin e conocemento.

   Segun Balkestein, durante e Trade Mission aki, bo ta bay haya sa con pa lanta bo negoshi, di bira un business account, esey ta garantisa, cu e momento cu bo ta bay cu bo paspoort, bo ta haya un business account eynan, y KvK lo guia esey.  Tambe lo tin mas profesional cu lo yuda cada comerciante, y tambe tin experto cu lo dunabo reglanan fiscal, pasobra esey ta importante debi cu si bo faya of no haci’e corecto, kizas lo bo no probecha optimalmente, of ta paga cierto suma cu bo no kier paga.

   Ademas leynan ta diferente na Merca, y aki tambe bo ta haya experto cu ta dunabo training durante workshops pa sa kico ta importante.  Hasta ta haya training con bo ta “pitch” bo producto, pues e forma cu bo ta promove producto na Merca, ta full diferente cu den Caribe.

   E Trade Mission ta un chens pa conoce esnan di Grand Miami Chamber of Commerce, tambe contactonan cu Banconan cu lo tey, y inversionistanan.  Lo tin reunionnan business-to-business y tambe un Expo, kiermen e ta hopi amplio, y abo como comerciante lo bo no ta bo so.  Tambe bo por haci uzo di e Trade Mission pa habri bo bank account na Merca na unda bo por haci bo business hopi mas eficiente pero tambe reglanan fiscal mas modesto.  Pues e ta un bon oportunidad di mes!

   Tur hende sa cu mas cu 54% di e productonan etc. ta bini di Miami (di Merca), pues e lazo cu Merca ta keda hopi importante.  Pesey Camara di Comercio kier wak cu mas y mas hende ta bende e productonan den exterior pa genera un poco mas placa pa nos pais.

   Esnan cu kier bay, riba e website di Camara di Comercio tin e QR-code cu e link, pa haya mas informacion y pa inscribi.