The content originally appeared on:
Diario
Parlamentario Ricky Hoek (MEP):
ORANJESTAD (AAN): Pa awe, dia 6 di Maart na Noord, for di 6:30 pm te 9 pm na Club Don Bosco lo tin un biaha mas e ya caba exitoso ‘Ban Topa’.
‘Ban Topa’ ta un programa informativo cu ta tuma luga den diferente bario cu e meta di ademas di informa, delibera y duna contesta na pregunta di comunidad relaciona cu diferente topico cu ta regarda Aruba.
Pa inicia, e temporada number dos di ‘Ban Topa’ lo tin como invitadonan: Endy Croes, Marco Berlis y Evelyn Wever-Croes. E topiconan lo ta: Educacion, Rol di Parlamento y Situacion di Aruba.
Ya caba, Parlamentario Ricky Hoek a anuncia na final di 2023 cu e Programa ‘Ban Topa’ ta continua na 2024 ofreciendo oportunidad pa participacion activo na pueblo di Aruba.
Den su rol como Presidente di Partido MEP, Hoek a expresa su agradecimento na tur hende cu a participa, a atende y a yuda organiza e programa ‘Ban Topa’ durante aña 2023, cual ta un iniciativa di Movimiento Electoral di Pueblo (MEP).
E proyecto aki a resalta como un di e enfokenan principal di MEP, dirigi na comunidad, cual a cuminsa na januari 2023. Na 2023 a organisa cuater sesion: na Piedra Plat, Savaneta, San Nicolas y Noord. Tur actividad tabata hopi exitoso, cu participacion di un cantidad grandi di hende. Preguntanan importante a keda formula cu a wordo atendi efectivamente.
Entre e preguntanan a inclui topiconan relaciona cu infrastructura, asfalt, costo di bida, belasting, asistencia huridico entre otro. E ministernan, parlamentarionan y candidatonan di Partido MEP a atende e preguntanan durante e programa ‘Ban Topa’.
Pa aña 2024, Hoek a anuncia cu e programa ‘Ban Topa’ ta continua den luna di Maart proximo . Ta invita comunidad pa ta presente, pasobra e programanan aki ta brinda oportunidad pa expresa preocupacion, sugerencianan y haci preguntanan na gobierno.
“Nos ta topa durante ‘Ban Topa’, asina Parlamentario Ricky Hoek a conclui.
