The content originally appeared on:
Diario
ORANJESTAD (AAN): Diasabra ultimo durante Grand Lighting Parade Oranjestad, Aruba Tourism Authority a
desvela locual ta bira e proyecto di ‘Aruba ta presenta The Invaders and Steelpan History’. Un proyecto di un gran magnitud y bunitesa cu lo ser admira durante Parada di Luz San Nicolaas, sigui pa Parada Grandi di San Nicolas, y Parada Grandi di Oranjestad.
E iniciativa remarcabel aki a conta cu participacion legendario di Aruba Invaders, e banda di steelpan di mas bieu y stima na Aruba. Cu un historia rico di mas cu 70 aña, Aruba Invaders a sa di domina e arte di musica y a dedica nan mes pa pasa nan conocemento musical y herencia cultural di musica di steelpan na diferente generacion.
E presentacion di e trailer di A.T.A. hunto cu Aruba Invaders tabata e punto di atencion riba e anochi magistral aki. Por a presencia mensahe general di A.T.A., un presentacion di videonan di carnaval di antes te cu awor, y tononan musical di steelpan mas emblematico di Aruba. E bunita colaboracion aki tabata un celebracion y un regalo na e comunidad di Aruba dedica na e legado cultural di Aruba su carnaval.
Alavez, A.T.A. a pone disponibel un Qr-Code riba e trailer cu ta brinda detayenan tocante e proyecto den su totalidad, historia, diferente video y musica di pasado te awor. Nos ta invita e comunidad pa scan esaki durante di parada of bishita e website:
www.bit.ly/aua-steelpan
Un invitacion ta ser extendi na e comunidad local y bishitante di e isla pa uni nan mes na e proyecto historico aki. Disfruta di e ritmo contagioso, captura momentonan inolvidabel, y bira parti di e legado carnavalesco cu lo keda resona den e cayanan vibrante di Aruba.
Un danki special na Go Cultura Foundation y Elite Productions, y na e siguiente organizacionnan pa cu nan contribucion y conocemento: Departamento Arubiana-Caribiana di Biblioteca Nacional di Aruba, Señora Graciela Nedd-Cheng, Archivo Nacional di Aruba, Señora Maybelline Arends-Croes, Rebecca Roos Productions, canal di YouTube: Roos Productions.
