The content originally appeared on:
Diario
E lo tuma luga diahuebs 21 di Maart
ORANJESTAD (AAN): Diahuebs mainta tabatin un conferencia di prensa organisa door di Crisis Management Office unda a anuncia nan proximo actividad cual lo ta e asina yama ‘Caribe Wave 2024’ cu ta consisti di un training pa tsunami cu cada aña ta wordo haci pa mehoracion di e draaiboek y proceduranan pa Aruba di cada stakeholder.
Lothar Irausquin di Meteo Aruba a duna di conoce cu esaki lo tuma luga diahuebs 21 di Maart 2024. Riba caribewave.org lo haya tur e ‘handbook’ di e ehercicio aki, cual lo indica unda e teremoto y e tsunami a sosode cu tur descripcion.
Ta bay traha cu dos scenario. Un ta Puerto Rico y otro ta Panama. Mester scoge den cual escenario kier’e y CMO a scoge pa Panama. Panama ta mas significante ya cu e olanan ta mas halto cu ta yega Aruba compara cu esun di Puerto Rico.
Den e scenario di Panama ta stipula cu lo tin un teremoto di 8.5 grado di magnitud den scala Richter pa 11 or ora local. E olanan lo ta entre 1 cu 3 meter halto. Ora esey ta asina, e criteria ta pa tur hende evacua beach. Henter costa mester wordo evacua, Irausquin a indica.
El a describi tur e proceso di kico lo pasa ora cu alarma drenta cerca nan y kico lo ta e procedura pa informa comunidad di Aruba pa medio di ‘Tsunami Bulletins’ cu lo wordo emiti na Papiamento, Ingles, Spaño y Hulandes. E aña aki a inclui idioma Spaño den dje, a remarca.
Ta encurasha comunidad pa registra na ‘Tsunami Zone’ pa participa den e training aki pa medio di un email adress, cu cantidad di hende cu ta participa y e tipo di ehercicio cu ta bay haci.
Riba http://itic.ioc-unesco.org lo por haya tur e informacion relaciona cu CaribeWave 2024, Lothar Irausquin a duna di conoce.
