The content originally appeared on:
Diario
Den un situacion suspenso creciente na caminda pa eleccion
*Investigacion Tribunal Criminal Internacional di Maduro posibel
*Eleccion Venezuela den luz di acusacion crimen contra humanidad
ORANJESTAD(AAN)—For di momento cu 22 di April 2024 a bati na porta, DIARIO a keda pendiente di e situacion cu mester a wordo tuma dor di Gobierno di Aruba enfrente posibel reapertura di e frontera entre Venezuela y Aruba.
Si na un forma continuo e topico aki tabata den centro di atencion for di momento cu e frontera a wordo cera, e desaroyonan sumamente serio na Venezuela na caminda pa un eleccion, pa DIARIO tabata e realidad mas drastico den e decision cu mester a wordo tuma.
Suspenso mundial tabata crece ayeratardi ora DIARIO a ricibi e informacion cu e frontera entre Aruba y Reino lo keda cera cuatro luna mas.
Na 2019, tabata Gobierno di Venezuela cu a cera e frontera sin consulta y acuerdo previo. E acusacionnan di Nicolas Maduro no tabata tin ningun base, pero mester bisa cu pa Aruba sigur tabata un alivio cu Nicolas Maduro a cera e porta entre e dos paisnan na momento di gran suspenso internacional y noticianan alarmante tocante e alianza di Nicolas Maduro cu paisnan peligroso na nivel mundial.
Trafico entre Aruba y Venezuela a keda completamente cera, te na mei 2023 ora a habri e frontera maritimo entre e dos paisnan basa riba palabracionnan entre autoridad di Aruba y di Venezuela.
Ayera, na momento cu e ultimo decision pa prolonga e ciere tabata yega su ultimo fecha, e informacion a drenta cu Gobierno di Aruba a firma e decreto pa prolonga e ciere cu cuatro luna mas.
Pa DIARIO e decision aki tabata representa un informacion di alivio cu mester a entrega na Pueblo di Aruba.
Manera DIARIO a informa Aruba na varios ocasion den e ultimo lunanan aki, na caminda pa eleccion 2024, Venezuela ta confronta un situacion sumamente serio den cual e menaza pa derechonan humano na Venezuela a bira cada rato mas grandi.
E conflicto entre Venezuela y Guyana ta representa un suspenso mas grandi cu nunca.
E forma cu Nicolas Maduro ta atende cu derecho humano, tabata motibo pa den pasado Merca a impone sancionnan riba e pais, cu despues di promesa di Nicolas Maduro cu eleccionnan di 2024 lo ta liber, a wordo suspende pa Gobierno di Biden na Merca.
Sinembargo, Merca a dicidi pa bolbe impone e medidanan aki despues cu a bira visto cu Nicolas Maduro no ta duna ningun garantia cu e lo sigui reglanan democratico den e proceso electoral 2024.
Mientrastanto informacionnan cu a alcansa DIARIO tambe ta indica cu Nicolas Maduro tabata tin un encuentro cu e Hefe di Corte Criminal Internacional, cu ta situa na Den Haag, Hulanda.
Tur indicacion ta, cu e Corte di Internacional di Husticia lo cuminsa cu un investigacion contra Nicolas Maduro pa crimennan contra humanidad cu ta manifesta nan mes den e forma cu e ta deshaci di oposicion contra su persona como Presidente di Venezuela.
Di parti di e Corte Internacional di Husticia mes, DIARIO no a ricibi ningun informacion.
E peticion pa investiga Nicolas pa Crimen contra Humanidad a bini di 17 pais Latino Americano, cu ta mustra con na 2017 hasta crueldadnan sexual mester a cera boca di personanan cu kier a opone Nicolas Maduro como dirigente Venezolano.
DIARIO pa basta tempo ta bati alarma na Aruba pa e situacion sumamente serio na Venezuela, cu tin pacto directo tambe cu Rusia, cu segun informacion Nicolas Maduro lo bishita dentro di poco.
Cu e regreso di sancionnan Mericano contra Nicolas Maduro, e problemanan di e pais pa haya entrada financiero, ta bolbe baha y ta afecta economia.
E portanan entre Aruba y Venezuela pues por lo pronto lo keda cera y DIARIO lo sigui duna Aruba tur informacion necesario mientras eleccion na Venezuela ta acerca.
