Algun Parkeermeters ya caba a cuminza deteriora na Playa

ORANJESTAD (AAN): Diaranson awor, esta 22 di Juni 2022 ta exactamente 7 aña pasa cu e compania AruParking NV a wordo lanta oficialmente na Aruba. 

Su trabao den cierto angulo a wordo aprecia masha hopi mes pa clientenan cu ta bay haci compras y porfin ta haya lugar pa staciona.  Pero e trahadornan mes no a keda hopi contento cu awor nan ta haya lugar specifico pa staciona, y tin di paga un suma mensual pa haya derecho pa haci tal.

   Na varios ocasion DIARIO a publica relato di ciudadanonan cu porfin ta haya lugar dilanti nan negoshi preferi na Playa pa haci compras.   Antes bo tin di staciona bo auto masha leu mes, pasobra a sali na cla cu mayoria lugar di staciona tabata ocupa pa trahadornan mes.

   Aunke tabatin hende cu si ta contento cu e sistema di AruParking, otronan a keda insisti cu e no ta yuda cu nada, y a cuminza resona nan voz mas fuerte.  Ora cu Gobierno a cambia, e ordo a bin pa stop di cobra pueblo.  Y te cu awor, asina el a keda tambe.  Resultado ta cu tin Parkeermeters plama tur rond di Playa.

   Recien Gobierno a duna un ‘hint’ cu ta trahando riba un plan pa AruParking cuminza opera bek.  Tur esaki ta yuda yena e caha di Gobierno sin duda alguno, pero a bisa cu e plan ta pa haci esaki uno mas ‘social’ pa comunidad, pero cu ta yuda comerciantenan atrae cliente mas facil.

   Y manera por mira riba e potret aki saca den fin di siman, e aparatonan di Parkeermeters despues di 7 aña a cuminza mustra cu nan ta deteriorando. Y esaki ta djis e bista for di exterior, sin sa con e circuitboard interno, incluyendo e sistema di comunicacion wireless, machine di placa, printer, y LCD display ta ainda.

   E verf a cuminza oxida, y ta mustra cu si acaso AruParking cuminza opera bek, lo tin di bay renoba algun di e Parkeermeters aki sigur pa asina nan por traha bek y genera placa pa Gobierno.