Hues a dal chauffeur burachi cu castigo di 4 aña pa Hit & Run fatal riba turista
Siendo cu Fiscal a exigi 3 aña di prison
- El a dal e turista femenino y tambe su yiu muhe
- Security Video den Bar Restaurant a cambia opinion di Hues
ORANJESTAD (AAN): Riba Diabierna, e homber Colombiano di inicial O.D.P. di 36 aña di edad, a presenta den Corte y a scucha Hues bisa cu e ta haya O.D.P. culpabel di a dal un dama turista cu un auto compacto mata y core bay.
Hues a bisa cu el a dicidi na aumenta e castigo exigi pa Fiscal. Hues ta haya cu Fiscal a exigi e castigo di 3 aña di prison, y cu pa 4 aña no mag di tin rijbewijs, a base di orientacion di casonan pasobra no por a calcula e cantidad di alcohol cu O.D.P. tabatin den su curpa. Esaki pasobra O.D.P. a bay sconde despues di e accidente y ta despues di 1 luna a logra detene.
Hues a basa su mes riba imagennan di video capta mas trempan e anochi ey, unda ta mira cuanto alcohol O.D.P. tabata bebe hunto cu su amigonan. Video ta graba den e bar unda nan tabata bebe hunto cu O.D.P.. E amigonan a bisa Polis cu O.D.P. a bebe hopi.
Dal turistanan y sigui core: E caso a socede riba e anochi di 27 di December 2025. E dos turistanan a caba di yega Aruba, y e anochi ey nan a cana riba e caminda conoci como ‘Caya Musica’ rumbo pa Supermarket pa cumpra algo pa nan estadia. E pida caminda aki ta den un parti scur banda di hopi mata y yerba na rand di caminda, bao area di Cunucu Abao. E auto bayendo nort direccion Bubali, a pasa dal nan, lagando e mama na rand di caminda den yerba, y e yiu muhe un tiki mas paden den mas yerba diki.
Via video conference, e dama Michelle Rodriguez, kende ta yiu di e victima Lisa Marie Barnett, a mira y scucha e momento cu Hues a dicta sentencia. Michelle Rodriguez tabata hunto cu su mama y e tambe a wordo gedal door di e auto compacto maneha pa O.D.P. e anochi ey. Lisa Marie Barnett di 57 aña di edad a keda hospitaliza den estado critico na Hospital HOH, pero lamentablemente el a fayece 13 di Januari 2026 di e heridanan cu el a sufri.
Hues a bisa cu e ta haya legalmente proba cu O.D.P., bao influencia di alcohol a dal Rodriguez y Barnett riba Caya Musica den oranan di anochi y a sigui core bay. O.D.P. a bay sconde e auto cerca un amigo na Alto Vista y O.D.P. a bay sconde pa Polis.
Hues a bisa cu e bentananan di e auto tabata getint y un di e luznan dilanti no tabata funciona bon. Na opinion di Hues, O.D.P. no a paga suficiente tino riba caminda y para pa laga e dos turistanan pasa. Hues a bisa cu O.D.P. ta culpabel di a core sin paga tino y no di a core responsabel.
Hues a rechaza declaracion di un testigo cu a bisa cu el a mira cu ta un truck of pickup a dal e victima. Hues a mustra cu for di camera di seguridad a mira cu no tabata e truck sino un auto compacto Honda Fit cu O.D.P. tabata core.
Chauffeur tabata hopi burachi: Hues a bisa cu for di e video di seguridad na The New Ban Ban Café na Playa Pabao por a mira cu O.D.P. a bebe masha hopi bebida. Esey ta haci cu O.D.P. no tabata apto pa core auto. Imagennan di video ta mustra cu O.D.P. a sali for di The New Ban Ban Café ta cana burachi. Polis a papia cu coleganan di O.D.P. kendenan tabata den The New Ban Ban Café. Nan a bisa cu nan tur tabata bebe pisa y O.D.P. tambe. Tin imagen di video di seguridad caminda ta mira cu na altura di Fantastic Garden, O.P.D. tabata core den e parti di direccion contrario.
Hues a subi castigo: Hues a bisa cu Fiscal a exigi 3 aña di prison y kita rijbewijs pa un periodo di 4 aña. Hues sinembargo den su opinion ta haya cu e anochi di 27 December 2025, O.D.P. a dal dos turista y core bay. E dama Barnett a muri despues. Hues a sigui bisa cu O.D.P. a kita bida di un persona y a causa trauma pa e famia cu a perde nan ser keri. Hues ta tuma O.D.P. na malo pa a core burachi, dal dos turista y core bay. A laga e auto scondi na cas di un conoci. A keda scondi 1 luna largo y despues a wordo deteni.
Hues a mustra cu e carchi di castigo di O.D.P. ta mustra cu na 2022, O.D.P. a haya multa pa tabata core burachi y mester a sigui curso riba consecuencia di core auto bao influencia.
Hues a bisa cu apesar cu no tin investigacion riba e grado di alcohol, e ta conclui cu mirando e cantidad di alcohol cu O.D.P. a bebe, O.D.P. tabata hopi bao influencia. Hues a remarca cu ta door di O.D.P. mes, cu a bay sconde, no por a determina e grado di alcohol den su curpa. Ademas Hues a mustra cu O.D.P. a core bay despues di accidente. Hues a bisa cu Fiscal no a tene cuenta cu e parti aki ora el a exigi 3 aña di prison.
Hues ta haya cu e castigo mester aumenta mas. Hues pues a subi e castigo di 3 aña, awor pa 4 aña di prison. El a condena O.D.P. na 4 aña di prison y 5 aña sin rijbewijs. Hues a bisa tambe cu e auto ta keda confisca.
Related News
Participantenan di Conferencia LGBTQI+ a intercambia opinion tocante diversidad na trabao
Docente Nilienne Donata a perde su bida riba Green Corridor
‘Aruba no mester mas caos pasobra Aruba mester accion’