Heridanan fuerte a ocasiona su morto
- E ta di 16 morto den trafico pa 2026
ORANJESTAD (AAN): Un biaha mas Green Corridor na Pos Chiquito ta reclama bida di un humano riba e pida caminda cu ni tin zebrapad, net na altura di e Parada di Bus banda panort cu tin entre Unico Hardware y Rei Hing Supermarket.
Diadomingo anochi pa mas o menos 10:32 pm, Central di Polis a wordo notifica di un accident unda un auto a pasa riba un persona cu tabata abao ariba caminda di Green Corridor.
A sali na cla, cu un dama peaton banda di caminda, a bay cruza e caya peligroso aki, pero dado momento aparentemente el a trompica y a sali cay. E tabata na banda panort di caminda, y un auto cu tabata bahando di San Nicolas rumbo pa Oranjestad, a mira e peaton benta abao na tempo, y el a hala stuur desvia pa asina pasa safe na banda di e persona.
Sinembargo e auto sedan Toyota Yaris color blanco cu tabata bin su tras, e chauffeur no a ripara na tempo kico ta pasando, y a bay dal y pasa riba e dama cu tabata abao riba caminda. Despues di esaki e Yaris a brake y a stop djis algun meter mas pabao. Su front bumper y grille a keda destrui door di e impacto.
Algun hende a core yama Polis, mientras cu otronan a core yega pa atende e dama abao riba caminda. For di e golpinan na su curpa, por nota cu e impacto a ocasiona multiple trauma na su parti ariba di curpa, incluyendo su cabez. Un pia tabatin un rudia cu fractura complica, indicando cu aki sigur wiel di e auto a pasa riba dje.
Unidadnan di Polis di San Nicolas a yega rapido, y a blokea e caminda aki pa trafico, y un rato despues Ambulance a yega. Mesora a nota cu e dama ta na bida, pero den condicion critico. A logra stabilize eybao, y a sali despues cu maximo urgencia rumbo pa Hospital HOH.
Polisnan a manda busca Departamento di Trafico pa asina start cu investigacion.
Pa como 90 minuut mediconan a trata e victima pa asina reduci e traumanan severo cu el a sufri, sinembargo no por a haci nada mas pe y pa 11:33 pm, Dokter na Servicio di Emergencia na Hospital a constata morto di Nilienne Rhulayma Mariana Donata, naci dia 27 di Juni 1981, pues tin 45 aña di edad.
Team forensico di BFTO tambe a yega na e lugar pa asina atende e accident aki pa tur cos wordo documenta. Bureau Slachtofferhulp tambe a yega Pos Chiquito pa duna sosten na famia di e fayecida.
Vocero Liliana Rasmijn a indica cu Nilienne a bira e di 16 morto den trafico insigur di Aruba pa 2026. Esaki ta un cifra basta halto, indicando cu trafico ta birando mas druk y insigur. Na e lugar aki mes na Pos Chiquito, apenas luna pasa dia 5 di October 2026 tambe tabatin un accident unda un Minivan a dal contra un peaton cruzando caya.
Tristesa pa alumnonan: Nilienne Donata ta un dama cu ta bay laga tres yiu, y alabes como cu e ta docente multi-facetico, e tin monton di ‘yiu’ na e scol cu e ta duna les na SPO Santa Cruz. Dialuna mainta, directiva di e scol a dicidi na hisa bandera na half-stok na honor di juffrouw Nilienne.
Juffrouw Nilienne ta un docente cu por domina idioma di señal di man pa studiantenan cu tin deficiencia auditivo. E ta un docente hopi admira y stima door di su colega- y alumnonan. Cerca su famia tambe e ta conoci como un dama keto.
Nan ta pensa cu el a bay cruza e caya y trompica y no a haya chens di lanta na tempo.
Na famianan di e fayecida, DIARIO y Cuerpo Policial ta manda palabranan di condolencia.
Related News
Prome Minister Mike Eman a haci yamada na pueblo y comercio pa aporta na renovacion di Cas...
Parlamentario Mike de Meza ta sostene aumento di salario minimo
Razzia na Papilon unda a haya hopi droga y a aresta dos hende