Ministro Geoffrey Wever y Gobernador di Estado Falcon ta fortalece cooperacion economico entre Aruba y Venezuela
14 November 2026
ORANJESTAD (AAN): Minister di Finansa, Asuntonan Economico y Sector Primario, Geoffrey Wever a ricibi Gobernador di Estado Falcon,
Venezuela, Sr. Víctor Clark, durante un bishita oficial na Aruba cu e obhetivo di fortalece e lasonan di amistad, cooperacion y relacion economico entre Aruba y Venezuela.
E bishita aki ta marca un paso importante den e relacion entre ambos pais, mirando cu ta e prome bishita oficial di un gobernador Venezolano desde e reapertura di frontera entre Aruba y Venezuela na augustus 2026.
Durante e encuentro, Minister Wever y Gobernador Clark a intercambia idea tocante diferente oportunidadnan pa fortalece cooperacion economico y stimula desaroyo sostenibel di ambos pais.
Un di e temanan principal cu a wordo discuti ta e importancia di stimula oportunidadnan comercial, incluyendo organizacion di misionnan comercial y ampliacion di posibilidadnan di importacion y exportacion entre Aruba y Venezuela. Ambos mandatario a enfatisa e importancia di sigui traha na un manera consistente y coordina pa stimula actividad economico, identifica oportunidadnan nobo y atende hunto cu retonan cu por afecta crecemento economico.
Otro tema importante durante e encuentro tabata e posibilidadnan pa fortalece cooperacion den e area di turismo medico. Gobernador Clark a comparti informacion tocante desaroyonan y mehoracionnan den e sector medico di Venezuela, particularmente den Estado Falcon, y a reafirma e interes pa bolbe brinda na residentenan di Aruba acceso na un variedad di tratamentonan medico specialisa, manera tabata e caso anteriormente.
Durante e reunion, Minister Wever y Gobernador Clark a reconoce e importancia di mantene comunicacion continuo y coordinacion entre ambos parti, cu e obhetivo di fortalece un cooperacion bilateral stabiel, constructivo y fructifero.
E bishita di Gobernador Clark ta reafirma e compromiso comparti pa mantene bon relacionnan diplomatico y economico, explora oportunidadnan nobo di cooperacion y contribui na desaroyo economico sostenibel di Aruba y Venezuela.
