Proteccion di salud publico ta un responsabilidad di tur

Segun Yvette Geerman di DVG:

• ‘Siguridad di cuminda y Carchi di Salud ta keda prioridad pa Departamento di Salud Publico den temporada di fiesta’ 

ORANJESTAD (AAN): Carchi berde, actualmente conoci como Certificado di Salud, ta un rekisito esencial pa personanan cu ta prepara, manipula of sirbi cuminda y bebida na publico na Aruba. E certificado ta contribui na proteccion di salud publico mediante control medico. Mantene esaki vigente y cumpli cu reglanan di higiene ta responsabilidad di cada persona cu ta traha den e sector.

   Yvette Geerman, hefe di Dienst Warenkeuring en Hygiëne di Directie Volksgezondheid (DVG), a splica cu, cu temporada di fiesta y actividadnan acercando, ta importante pa presta atencion special na siguridad di cuminda. El a señala cu ciudadanonan mester ta consciente di ken y na unda nan ta cumpra cuminda, y si esnan cu ta prepar’e ta cumpli cu e exigencianan di higiene stipula den ley.

   Segun Geerman, proteccion di salud publico ta un responsabilidad comparti entre DVG, esnan cu ta prepara y bende cuminda, y e consumidornan mes. Cada un tin un papel importante den prevencion di riesgonan pa salud.

   El a enfatisa cu tur persona cu ta manipula cuminda of bebida pa ofrece na publico mester conta cu un Certificado di Salud vigente. E certificado tin un valides di un aña. E proceso pa obtene e certificado ta cuminsa na DVG. E ta inclui dos examen medico: un test di faeces (sushi) y un röntgen di pecho (thorax).

   Geerman a reitera cu esnan cu ta cumpra cuminda, sea na un establecimiento of via Facebook y WhatsApp, tin derecho di puntra si e personanan cu ta prepar’e tin nan Certificado di Salud vigente y ta cumpli cu e reglanan di higiene. Esaki ta aplica tambe na venta di snacks, BBQ y otro cuminda prepara.

   Ademas di e certificado, limpiesa di e luga y di e materialnan, temperatura adecuado di e cuminda y higiene personal di esnan cu ta prepara, manipula y sirbi ta aspectonan fundamental pa proteha consumidornan. Ciudadanonan por solicita pa mira e Certificado di Salud di esnan cu ta prepara y sirbi nan cuminda.

   Finalmente, Geerman a indica cu, durante inspeccionnan y controlnan, incluyendo esnan cu ta resulta di un keho, DVG ta verifica si e personanan cu ta manipula cuminda y bebida tin un Certificado di Salud vigente.