Accionnan por intensifica si no presenta solucion satisfactorio pa empleadonan di Wit Gele Kruis

Segun Gina Maduro di Sindicato ABV:

ORANJESTAD (AAN): Desigualdad den salario y condicionnan di trabou a motiva empleadonan di Wit Gele Kruis (WGK) pa tene un protesta di un ora dialuna mainta na e sede di e organisacion na Santa Cruz. E accion, organisa pa Sindicato ABV, ta refleha e descontento cu diferencianan den beneficionan cu, segun presidente di ABV, Gina Maduro, ta persisti durante varios aña.

Maduro a splica cu Wit Gele Kruis ta un fundacion cu ta wordo considera gelijkgesteld conforme ley. Sinembargo, segun e lider sindical, dentro di e organisacion tin dos grupo di empleado cu no ta ricibi e mes beneficionan. Desde cu ABV a asumi representacion di e trahadonan, e sindicato a pone e necesidad di elimina e diferencianan aki riba mesa.

Segun Maduro, un grupo di 27 empleado, conoci como gelijkgestelden, ta ricibi, entre otro, bashi premie, gelijk bedrag y 13 dia di ATV, mientras e otro grupo di 103 empleado no ta ricibi e mes beneficionan.

El a indica cu na fin di e luna aki, solamente e grupo di 27 empleado lo ricibi e pago di gelijk bedrag. E exclusion di e otro 103 empleado, segun Maduro, ta aumenta e frustracion y disgusto entre trahadonan cu durante aña ta reclama un solucion. Tambe el a denuncia cu tin intimidacion, sin elabora mas riba esaki.

Maduro a enfatisa cu e empleadonan ta reclama nan derechonan y cu ABV ta sostene nan den e lucha pa logra un acuerdo cu ta garantisa trato igual dentro di e organisacion.

Segun e presidente sindical, e director di WGK a mustra cu e kier mantene e distincion entre e dos gruponan, un postura cu ABV ta rechasa. Den e contexto aki, e sindicato a convoca un reunion general dialuna mainta pa informa su miembronan tocante e situacion. Despues di e reunion, a sigui cu e accion di un ora, sin paralisa e servicionan di WGK y manteniendo continuidad di cuido pa e pashentnan.

Maduro a reitera cu e meta di ABV ta pa elimina e desigualdad y logra cu e empleadonan ricibi e beneficionan cu ta coresponde nan, mescos cu den otro fundacionnan.

El a adverti cu, si gerencia no duna un reaccion positivo y no presenta un solucion satisfactorio, ABV lo intensifica su accionnan inmediatamente. E sindicato tampoco ta exclui e posibilidad di acudi na corte.

Ademas di e reclamonan laboral, Maduro a expresa preocupacion tocante e maneho interno di WGK. El a menciona cambionan di diferente hefe di departamento dentro di un periodo corto, entre otro desaroyonan cu, segun e, ta merece un evaluacion mas profundo.

Pa e motibo aki, ABV ta sugeri pa haci un investigacion di e maneho di e organisacion. E sindicato ta mantene cu tanto e reclamonan di e empleadonan como e preocupacionnan tocante e funcionamento interno mester wordo atende cu seriedad y cu solucionnan concreto.