Razzia na Papilon unda a haya hopi droga y a aresta dos hende

Accion di siman pasa

ORANJESTAD (AAN): Den fin di siman, vocero policial Liliana Rasmijn a haya luz berde pa asina confirma na prensa cu Diamars siman pasa autoridadnan hudicial a tene un razzia di sorpresa na un cas na Papilon.

   E razzia tabata bao encargo di Unit Narcotica di Cuerpo Policial, y e accion aki a wordo acorda cu Ministerio Publico, y ta relaciona cu importacion di droga, e.o. Hasj y tambe Ecstasy (XTC) y pa posesion di arma di candela.

   Polis a bisa cu durante di e entrada di hudicial, agentenan a canta bingo pasobra a bin topa cu cantidad grandi di marihuana y tambe hasj.  Dos persona cu tabata eynan a wordo aresta.

   Vocero di Polis a bisa cu ta trata di e homber L.J.V.P. di 28 aña naci na Colombia, y e muhe R.W.S.H. di 38 aña naci na Suriname.

   Pa cu e accion aki diferente departamento di KPA a forma parti entre otro, Team di Aresto y K9-Unit.

   Cuerpo policial Aruba ta haci un suplica na comunidad, cu si bo sa algo of bo a wak algo yama e tipline di polis cu ta 111-41, y corda cu bo ta keda anonimo.