Tour Operators Uni a logra avancenan concreto den cinco siman di colaboracion

ORANJESTAD (AAN): Den un periodo di aproximadamente cinco siman, entre e firma di e protocol cu Gobierno na september y e reunionnan di 16 di october,

Tour Operators Uni a logra avancenan concreto pa fortalece turismo responsabel na Aruba. E trabao conhunto a trece propuestanan specifico pa combina proteccion di naturalesa cu uzo responsabel di e camindanan existente. Pa prome biaha den 20 aña, operadornan di tour local a haya un mesa di dialogo cu Gobierno, y e resultadonan ta mustra cu dialogo ta e base pa un bon relacion.

   ABC Tours y su team a traha e prome concepto di e Nature Driving Protocol y a comparti esaki cu e otro operadornan, como base pa comparti casi 30 aña di experiencia di e compania. E iniciativa a nace pa yuda e sector, coregi malentendimentonan y trece claridad den un tema cu hopi biaha a keda discuti sin suficiente informacion y sin participacion di operadornan cu trayectoria largo.

   Core riba caminda: Tour Operators Uni ta aclara cu e tournan cu licencia ta core riba e camindanan di tera existente, conoci como zandwegen, cu ta den uzo desde añanan 80 y cu DOW mes ta mantene. E vehiculonan ta keda riba e caminda y no ta sali for di e ruta pa core den tereno natural. E termino "off-road", manera otro a uz'e den diferente comunicado, ta duna e impresion cu operadornan ta bandona e camindanan existente pa core liber den naturalesa. Esey no ta e manera cu e tournan ta opera. Un caminda cu no ta asfalta ta keda un caminda; core riba dje no ta nifica cu e vehiculo a sali pafo di caminda.

   Den e proceso aki, e operadornan a bira mas uni, casi un famia den e sector. Nan a comparti experiencia y uni esfuerzo cu un proposito comun: cuida nos naturalesa y asumi responsabilidad hunto pa e manera cu e sector ta opera. E union aki a fortalece e disposicion pa yuda otro y pa sostene reglanan cu tur miembro mester respeta. E firma di e protocol pa maneho responsabel den naturalesa cu Gobierno a forma un base importante pa e dialogo. E protocol a pone topiconan manera definicion cla di ruta, monitoreo, capacitacion di guia y control na mesa, cu e meta di desaroya solucionnan duradero.

   Cu GPS y mas: Dia 28 di september, Tour Operators Uni a entrega Gobierno un protocol mas amplio, cu GPS obligatorio pa cada vehiculo comercial di tour, verificacion di guia y vehiculo, y sancionnan cla ora e reglanan no ta cumpli: multa pa e compania responsabel, y den caso di violacion serio of repeti, suspension of retiro di participacion den e protocol. Den casonan cu ta justifica esaki, e protocol ta pidi e autoridad competente pa evalua e permiso pa opera excursion, conforme e reglanan y procedimentonan aplicabel. Asina operadornan mes a tuma e iniciativa pa propone reglanan y sancion pa esnan cu ta viola e reglanan y cu ta drenta zonanan protegi.

   E colaboracion tambe a avanza riba tereno. Durante e inspeccion na Tera Cora cu Minister Rene Herde y director di DNM, Sr. Gisbert Boekhoudt, operadornan a ricibi splicacion directo tocante areanan sensitivo y proteccion di flora y fauna. E bishita a duna e partidonan oportunidad pa observa e situacion hunto y intercambia informacion specifico di e area.

   Proposicion Tera Cora: Tour Operators Uni a contribui cu su experticio na e propuesta temporal di Gobierno pa Tera Cora, cu aproximadamente 27 punto. Esaki ta inclui uzo di rutanan aproba, reduccion di velocidad y perturbacion di naturalesa, monitoreo, sancionnan y contribucion financiero di e sector na proteccion di naturalesa. E propuesta ta pendiente di aprobacion y ta contempla colecta di data pa un Milieueffectrapportage (MER) cu lo guia decisionnan pa futuro.

   Riba tereno tecnologico, dia 14 di october SETAR a instala un unidad piloto di GPS na ABC Tours, como contribucion na e esfuerzo conhunto di Tour Operators Uni. Durante e reunion di 16 di october na Cocolishi, SETAR a presenta e sistema na Tour Operators Uni y staf di Minister Herde. Tour Operators Uni a comparti su experiencia practico pa explora con monitoreo di ruta y velocidad por yuda proteha areanan natural, cu informacion confiabel y reglanan cla riba uzo y proteccion di data.

   Na mes fecha, un encuentro cu Aruba Tourism Authority (ATA) a crea oportunidad pa mustra e sistemanan y procedimentonan cu operadornan tin implementa caba, incluyendo GPS, control di ruta y velocidad y protocolnan di siguridad. E intercambio a duna ATA un bista mas completo di e medidanan cu ta forma parti di e operacion diario di e companianan. ATA a mustra apertura pa evalua e propuesta di un taskforce cu lo fortalece colaboracion y control den e sector. E posibilidad di desaroya un programa di certificacion hunto cu Tour Operators Uni tambe a forma parti di e dialogo, como un paso pa establece normanan profesional mas cla.

   Vehiculonan V-nummer: Durante e dialogo, Tour Operators Uni a señala e problema di vehiculo di renta y operadornan ilegal cu ta core sin guia, sin ruta fiho y sin control, y a propone responsabilidad concreto pa companianan di renta. Algun compania di renta ya caba ta trahando riba nan transicion for di renta pa tour cu guia. Pa trece respet bek den nos industria y, sobre tur cos, pa nos naturalesa, Gobierno mester introduci e mecanismonan di control y handhaving necesario.

   Un maneho cu ta exclui e conocemento y experticio diario di operadornan no ta trece solucion duradero. Pesey Tour Operators Uni ta insisti riba un taskforce hunto cu Gobierno, ACF, ATA y operadornan, pa establece reglanan cla y control efectivo riba e camindanan existente.

   E avancenan aki ta refleha e balor di traha como un sector uni. Tour Operators Uni ta agradeci Gobierno, DNM, SETAR y ATA pa nan apertura y contribucion, y ta reconoce e esfuerzo di e companianan miembro cu a pone nan conocemento practico na disposicion di e proceso. Tour Operators Uni, hunto cu tur su operadornan, ta comprometi pa traha man den man cu cualkier instancia, departamento di Gobierno of NGO pa garantisa un maneho transparente cu ta beneficia naturalesa y nos dushi Aruba.

   Tour Operators Uni ta bolbe manda un invitacion na Aruba Birdlife Conservation pa forma parti di e dialogo. E invitacion ta keda habri.