Regulacion di vacation rentals ta un paso importante pa un desaroyo economico responsabel y sostenibel

Ministro Geoffrey Wever:

ORANJESTAD (AAN): E sector di vacation rentals a conoce un crecemento significativo den e ultimo añanan y actualmente ta forma un parti importante di nos producto turistico y economia. Reconociendo e importancia di e sector aki, Minister di Finansa y Economia, mr. Geoffrey Wever, hunto cu Minister Herdé y Minister Cicilia, a traha riba un plan di accion pa trece mas claridad, structura y perspectiva pa e sector.

   Conseho di Ministro a aproba e plan di accion aki, cu ta enfoca riba registracion y regulacion di vacation rentals existente, respeto pa derechonan actual y un maneho responsabel pa e futuro desaroyo di e sector, cual conseho di minister ta reconoce como uno importante pa nos pueblo.

   Segun cifranan di Banco Central di Aruba, durante 2025, 35.1% di e turistannan di estadia a opta pa keda den short-term vacation rentals, compara cu 32.9% na 2024. E cifranan aki ta demonstra e posicion importante cu vacation rentals ta ocupa dentro di nos producto turistico.

   Ademas di su contribucion na turismo, e sector ta genera actividad economico nobo pa pueblo di Aruba. Pa individualnan, comerciante y tambe, dunadornan di servicio local, incluyendo mantenemento, limpieza, transporte, gastronomia y otro servicionan relaciona cu turismo.

   Pa Minister Wever, e realidad economico aki ta subraya e importancia di establece un maneho cu ta tene cuenta tanto cu e interesnan di inversionistanan y comerciante, como cu bienestar di nos comunidad.

   E meta no ta pa limita un sector cu ya ta forma parti di nos economia, sino pa crea un mercado organiza y regula cu ta permiti Gobierno compronde e mercado miho, respeta derechonan existente y determina con e sector por sigui desaroya di forma responsabel y sostenibel.

   Como prome paso, Gobierno lo introduci un proceso di registracion pa tur acomodacion existente cu ta wordo uza como short term vacation rental, incluyendo esnan cu ya tin nan permisonan.

   E periodo di registracion lo ta di tres luna, conta for di e fecha oficial di inicio cu lo wordo anuncia pronto.

   E registracion lo permiti Gobierno identifica e acomodacionnan existente, nan ubicacion, cantidad di unidadnan, capacidad y e derechonan y permisonan cu nan tin actualmente.

   A base di e informacion aki, Gobierno, por medio di su Taskforce, lo por determina cua ta e siguiente pasonan necesario pa cada acomodacion y crea un bista mas completo di e sector.

   Un parti importante den e maneho aki ta e respeto pa derechonan existente. Acomodacionnan cu ta opera legalmente por sigui cu nan actividadnan dentro di e condicionnan vigente.

   Pa otro acomodacionnan existente cu registra, Gobierno por medio di su taskforce, lo evalua e posibilidadnan di regulacion y legalisacion, teniendo cuenta cu varios detalles y condicionnan aplicabel na cada caso. E evaluacion lo wordo haci lo ta abase di varios aspecto, por ehempel siguridad, capacidad, parkeo, accesibilidad, impacto riba e bario y proteccion di medio ambiente.

   Durante e proceso aki, Gobierno ta preparando un maneho temporal di tolerancia (gedoogbeleid) pa uzo existente cu a wordo registra. E maneho aki tin como proposito di establece un marco temporal durante cu e proceso di regulacion ta sigui su curso, y mester pasa door di evaluacion juridico y aprobacion prome cu por aplica.

   E fecha di referencia di 1 di november 2026 lo determina cua acomodacionnan ta wordo considera como ‘uzo existente’ y cua proyectonan por cualifica pa evaluacion bou di e areglo di transicion. E fecha aki no ta e fecha di inicio ni e fecha final di registracion.

   Registracion ta e prome paso pa determina e ruta apropia pa cada acomodacion, pero no ta representa un permiso of legalisacion automatico.

   E plan di accion ta tene cuenta cu e diferente caracteristicanan di nos areanan y barionan. Pa esaki, Gobierno tres categoria di area, conforme cu e ROPV.

   E acercamento aki ta permiti Gobierno tene cuenta cu e realidad di cada area, mientras ta busca un balance entre actividad economico, vivienda, turismo y calidad di bida di nos habitantenan.

   Un taskforce interministerial cu representantenan di Finansa y Economia, Infrastructura, Salubridad Publico y Turismo lo coordina e registracion, elabora e condicionnan y presenta e resultadonan na Conseho di Ministro.

   Paralelamente, Gobierno lo prepara, caminda ta posibel y necesario, cambionan na e ROPv vigente y lo cuminsa cu e revision integral di ROP y ROPv.

   E proceso aki lo inclui oportunidadnan pa habitantenan, comerciante y otro partidonan involucra participa y presenta nan reaccionnan durante e proceduranan formal di consulta publico cu stakeholders.

   E taskforce lo anuncia proximamente e procedimiento di registracion digital, e documentonan necesario y e canalnan oficial pa informacion y preguntanan.

   Cu e iniciativa aki, Gabinete AVP-Futuro ta haciendo un paso importante pa trece mas claridad na un sector cu a desaroya considerablemente, reconociendo su contribucion economico y creando e base pa un futuro cu ta combina inversion, actividad economico y bienestar di comunidad.