Artefacto parecido na un Bom haya pafo di Oficina di Refineria di Aruba

ORANJESTAD (AAN): Diadomingo mainta pa mas o menos 6:26 am, Central di Polis a wordo informa cu na altura di e edificio di RDA

situa na comienzo di Caya Dick Cooper na San Nicolas, poco pariba di San Nicolas Store tin un artefacto sospecho (parecido na obheto explosivo) band’i un baki di mata.

   Central di Polis a core manda unidad di Polis di San Nicolas pa yega eynan cu cautela, y raporta loke nan ta mira.  E prome unidad cu a yega, enberdad a topa cu un artefacto sospechoso, pero a indica cu e ta riba e isleta, un tiki pabao di e plataforma di Plaza Lolita.  Pero nan a seya full e area, stop trafico di auto y hende di yega cerca.  Central di Polis na su turno a pone departamentonan concerni na altura.

   Polis a sigui tuma mas precaucion door di cera rond di e lugar di e sucedido pa ningun hende no yega cerca wardando  pa e yegada di expertonan di explosivo presenta.

   Na final despues di investigacion, e expertonan a conclui cu no ta trata di ningun pakete cu contenido explosivo.

   Toch ta mira cu Polis ta tuma casonan asina na serio y ta tuma tur precaucion necesario.

   Departamentonan cu a presenta ta Alto Mando di KPA, Brandweer, Ambulance, Oficina di CMO y como tambe EODD (Explosieven Opruimingsdienst van Defensie).  Despues por a habri e area bek pa nos comunidad y bishitantenan.