Drive-by Shooting fatal na Pos Chiquito a laga 2 mucha sin mama

Dama conoci como ‘Didi’ mata den su cura di cas

 *Auto a wordo haya despues cerca di Rooi Frances 

ORANJESTAD (AAN): Diasabra anochi tur cos tabata basta trankil riba Aruba, y trafico no tabata ni hopi druk mes.  Den e bario parti nobo di Pos Chiquito, tabatin un silencio enorme den e cayanan aki.

   Pero diripiente apenas algun seconde prome cu 3:00 am a bati, un total di 5 tiro a wordo scucha ta sona tras di otro, y nan a wordo tira den apenas 3 seconde di tempo.

   Cachonan den bario a cuminza spanta, y varios Security Camera a capta con un auto compacto tipo hatchback di 5 porta cu color cu ta mustra di ta shinishi scur ta move cu velocidad halto alehando di e cas.

   E caso a socede na cas di famia Vlaun, kendenan mesora a tende tiro y a bay check kico a pasa.  Pafo den cura di cas, banda di e auto staciona paden a bin haya nan ser keri benta abao den un posicion raro, y tabata manera hala su ultimo rosea y despues no a reacciona mas.

   Polis a yega den 6 minuut: Mientras tanto, yamadanan a drenta mesora na Warda di Polis, cu mesora a manda diferente unidad di Polis rumbo pa eynan.  Un vehiculo tipo Jeep 4x4 di Polis cu lo tabata den vecindario, a yega eynan den menos di 6 minuut, y a bin haya famia den panico den e cura di cas, y un dama benta abao den plas di sanger.  Despues mas unidad di Polis a yega, incluyendo di San Nicolas, y mesora nan a seya e caminda, pa preserva tur prueba.

   Polis a nota cu e dama no ta move nada mas eybao, y ora cu Ambulance a yega, Paramediconan a baha bay check y a bin constata cu e no tin ningun señal vital mas.  Nan a duna Polis un señal cu aki tin di bay yama Docter pa bin na e adres.

   Central di Polis a wordo notifica di tur esaki, y mesora a pone autoridad competente na altura, a notifica Recherche di San Nicolas, y a manda team forensico di BFTO y tambe personal di Bureau Slachtofferhulp pa acudi na e adres.

   Dos mucha chikito: E victima ta biba na e cas hunto cu su pareha, su mama, y tambe su dos yiu chikito.  Uno di nan ta mucha muhe kende ta bay haci 9 aña aki 2 luna, y e otro yiu homber lo cumpli otro luna su di 2 aña.  Nan tambe a bay pafo pa mira kico a socede, y posibelmente a topa cu e situacion cu nan mama abao den plas di sanger.

   Polisnan cu a yega, mesora a aleha e muchanan for di e area aki, pero nan tambe tabata na yoramento mirando con nan wela tabata yora.  Polis a aleha nan y bay haci e obra humano di trankiliza e muchanan aki, mientras cu otro agentenan tabata druk ta haciendo e investigacion.

   Tin indicacion cu e marduga ey nan tur ta drumi, y cu e criatura di 1 aña a spierta, y pesey e mama a bay traha su botter di tetero pa por dune lechi.  Aki ta bay investiga si acaso el a haya un message of su mes a sali bay pafo, y aki ta unda cu 5 tiro a wordo gelos den menos di 3 seconde.  Den un fraccion di momento, impacto di bala na su curpa a caba cu su bida.

   Docter a yega: Mientras tanto team forensico a yega, y tambe Docter Forensico di Polis.  El a check e victima, y a constata morto di Divienne Celine Lillian Vlaun, naci dia 12 Mei 199 na Aruba, pues tin 27 aña.  E victima awor ta biba na Pos Chiquito, pero den pasado tabata biba na Savaneta.  Su amiganan conoce como ‘Didi’ y tambe como ‘Celine’, y nan ta describi’e como un dama di caracter fuerte pero cu stima su famia mas cu tur cos.

   Bureau Slachtofferhulp a yega pa consola famia, y alaves tuma nota di tur detaye cu nan por a duna, pasobra nan tabata duna hopi teoria ta kico lo por a socede cu e victima Didi.

   Cuanto impacto di bala Didi a haya na su curpa, Vocero Policial no a bisa exacto.  El a uza e palabranan di “un of mas bala” a impacta e victima cu tabata den cura di su cas.

   Bario den spanto: Mientras tanto diferente unidad di Polis riba caya a cuminza ta check rond pa un auto hatchback di 5 porta color shinishi of preto.  Personal di BFTO a marca algun lugar di huls cu a haya benta abao riba caminda, y a cuminza documenta tur cos.

   Bisiñanan eybanda a cuminza reacciona cu spanto pa loke a socede.  Algun di nan a mustra cu por a sinti henter e siman aki un sorto di temor den e area, specialmente desde cu tabatin un tiramento di Diamars siman pasa den oranan di marduga cerca di e cancha di Basketball na Village na San Nicolas.  Hende ta pensa cu ta un grupo di troublemakers di Pos Chiquito lo a bay comete esaki, unda nan a los tiro riba un persona, pero e mes a sali ileso y ta dos otro hende inocente na banda a haya tiro.  Nan a wordo hiba ImSan y a sobrevivi.  Pero tabatin temor cu awor e gang di Village kizas lo ta pasando anochi of marduga den Pos Chiquito pa tuma venganza.  Pesey desde Diaranson caba no ta mira hende ta cana anochi riba cayanan aki, debi na temor.

   Tur esaki ta loke Recherche di San Nicolas ta bay investiga, pa mira si e caso di asesinato aki tin vinculo cu loke a socede Diamars 13 di October den marduga na Village.

   Despues cu tur e area a wordo documenta, ta shersh di Funeraria a bin recoge e victima pa bay cu ne.  No ta conoci si Fiscal a laga confisca e curpa of ya a dune liber na famia pa entiero.

   Auto a wordo haya: Diasabra ora cu solo a sali, banda di 10:20 am a raporta na Polis cu tin un auto laga atras banda di caminda pa bay Deposito di Wela, na Rooi Frances.  Riba pagina 4 di DIARIO di awe por lesa mas di e auto aki.

   E caso di Diasabra marduga a laga Aruba den un situacion tristo, sabiendo cu dos mucha chikito a perde nan mama den un sorto di asesinato desformal y innecesario.  Ta hasta cuestiona si acaso e hendenan a tira riba persona ekiboca.  E bon noticia ta cu Polis y Recherche a logra haya varios Security Camera video, y ta trahando incansabelmente pa soluciona e caso.  No ta conoci si a confisca e smartphone di e victima, pa asina haya sa ta ki mensahe el a ricibi cu a pone sali pafo e marduga ey.  Vocero Liliana Rasmijn ta suplica pueblo, si bo a mira algo, of sa di algo, pa yama e Tipline di Polis na 111-41 pa yuda soluciona e caso aki.  Corda cu nan ta garantiza cu bo ta keda anonimo.

   Na famia di Didi, tanto DIARIO como Cuerpo Policial ta extende nan mas profundo palabra di condolencia.