Prome deliberacion tocante Plataforma Union Europeo pa Reino

ORANJESTAD (AAN): Riba 1 y 2 di oktober representantenan di Aruba, Curaçao, Hulanda, Saba, Sint Eustatius y Sint Maarten a

reuni na Curaçao pa delibera tocante establecimento di un Plataforma Union Europeo (EU-Platform) nobo. E islanan den e parti Caribense di Reino tin e status di Pais y Teritorio Ultramar (Landen en Gebieden Overzee, LGO). Representacion di Hulanda na Willemstad a organisa e encuentro. 

E obhetivo di e EU-platform ta pa posiciona Reino Hulandes mas miho na Brussels, asina por haci miho uzo di oportunidad cu Union Europeo ta ofrece LGO. Pa Union Europeo e LGO tin balor strategico grandi como puesto externo den un mundo cu ta cambiando hopi lihe. Pa e LGO tin oportunidad particularmente den fondonan Europeo. 

Punto di salida pa e deliberacion ta e autonomia di e paisnan y cada un su relacion como LGO cu e comision Europeo. Representante Permanente di Reino Hulandes na Union Europeo na Brussels tambe tabata presente na e encuentro. E representacion aki ta di gran balor pa partnernan den Reino ora ta trata di haci uzo di oportunidad na Brussels y por duna un bon bista den e strategia di comision Europeo. Esaki ta dirigi mas y mas riba impacto geopolitico – un tereno caminda partinan Caribense di Reino por tin un rol importante. 

Mirando tur esaki a sigui papia tocante e posibel actividadnan di e EU-platform. Esakinan por dirigi riba (hunto) monitoria calls for proposals relevante pa e fondonan Europeo horizontal, inversion den e necesidad di training di e LGO y comparti conocemento presente, informacion y red. E proximo tempo e siete partnernan den Reino lo sigui traha hunto riba e topiconan aki.