Den fin di siman boluntarionan a planta 50 mata nativo di 14 diferente especie

Fase 2 di ‘Ban Lanta y Planta’ a start

• Reforestacion na e GMC Nature Reserve di Bucuti & Tara 

ORANJESTAD (AAN): Ban Lanta y Planta y Bucuti & Tara a Lansa Fase 2 di Reforestacion na B&T- GMC Nature Preserve, cu ta un pida cunucu na distrito di Noord.  E fase nobo aki ta sigui Fase 1, caminda mas di 1,200 mata nativo a wordo planta pa restaura areanan degrada y pa fortalece e vegetacion nativo di e preservacion.

   E Bucuti Tara – GMC Nature Preserve ta cubri mas o menos 14 hectare di cunucu protehi den curason di Noord. Estableci pa garantisa e proteccion permanente di un di e ultimo areanan berde y no desaroya den e region, e preservacion ta duna un habitat na e flora y fauna nativo, brindando localnan y bishitantenan e oportunidad pa disfruta di e naturalesa di Aruba.

   Durante e inicio di Fase 2 e fin di siman aki, boluntarionan a planta 50 mata hoben cu ta representa 14 especie nativo. A scoge e especienan aki pa nan adaptacion na e clima seco di Aruba, nan balor ecologico, y nan potencial pa brinda sombra, cuminda y habitat pa e fauna local.

   E seleccion tabata encera varios especie cu ta dificil pa haya y/of ta protegi na Aruba, incluyendo Taki (Geoffroea spinosa), Brasil (Haematoxylum brasiletto) y Palisia blanco (Bursera karsteniana). Dor di propaga y reintroduci especienan nativo manera esakinan, e proyecto ta yuda fortalece e populacion di matanan local, restaura e funcionnan ecologico y sostene e biodiversidad di Aruba.

   “Nos ta sumamente agradecido na Bucuti & Tara pa a invita Ban Lanta y Planta pa colabora den e iniciativa importante aki,” un representante di Ban Lanta y Planta a expresa. “Proyectonan manera asaki ta mustra kico por wordo logra ora cu organisacionnan, boluntarionan y e comunidad ta traha hunto pa restaura e ecosistemanan nativo di Aruba.”

   Ban Lanta y Planta (BLyP) ta un NGO local funda cu e meta pa planta matanan nativo, restaura paisahenan degrada y aumenta e consciencia ambiental na Aruba. E organisacion ta opera danki na e esfuerso di boluntarionan y cu sosteno di sponsornan, donacionnan y su programa di adopcion di mata.

   Atraves di e programa di adopcion, personanan por sostene e cultivacion y plantacion di un mata nativo y ricibi un certificado oficial di adopcion. Adopcion di mata ta wordo duna frecuentemente como regalo of en memoria di un ser keri. Boluntarionan di BLyP ta cultiva e matanan hoben nativo den nan nursery prome cu planta nan na areanan selecta pa reforesta rond di Aruba, incluyendo e GMC Nature Preserve.

   Apesar di e solo cayente, boluntarionan a presenta den gran cantidad pa e plantacion di Fase 2. Bucuti & Tara Beach Resort a percura pa e boluntarionan tabatin snacknan di fruta saludabel y awa friu y fresco pa mantene tur hende hidrata.

   Awo cu e prome matanan di Fase 2 ta den tera, atencion ta dirigi riba nan crecementu y cuido, sperando cu e temporada di yubida lo brinda condicionnan faborabel pa e matanan hoben por desaroya.

   Pa siña mas tocante e siguiente eventonan di plantacion, pa haci un donacion, of pa adopta un mata nativo pa bo mes of un ser keri, bishita e pagina oficial di Ban Lanta y Planta.