Turista di 49 aña a perde su bida den accident na Palm Beach

Auto a dal den kwihi y bolter den greppel

• El a bira e di 12 morto di 2026 

ORANJSTAD (AAN): E prome yamada a drenta pa 1:38 am di Diamars marduga na Central di Polis, indicando cu riba e caminda di Avenida Nelson Oduber, como 170 pa 200 meter zuid di rotonde di Palm Beach, un accident basta serio a caba di socede.

   E prome informe duna na polis ta cu un auto Hyundai color shinishi scur, di un manera of otro a baha caminda na forma violento, bay den e greppel cu ta sirbi como separado di e dos camindanan, lo a dal violentamente contra un palo di mata, y keda benta eybao, y tin dos hende herida.  Mayoria di e impacto ta na banda drechi di e auto, net unda cu e pasahero gravemente herida tabata sinta.

   Dos herido: Mesora unidadnan di Polis a yega, y a bin topa cu un situacion unda tin dos hende herida, di cual uno ta hopi mas grave.  Polisnan a check y e persona tin pulso hopi debil, y aki bao mes un agente policial hunto cu un testigo femenino a cuminza yuda cu practica CPR pa trata na resucita e persona gravemente herida.

   E proceso di reanimacion conoci como CPR a continua, y ora cu Ambulance a yega, nan a sigui atende e situacion.  E otro persona herida ta mas hoben pero ta djis varios golpi y corta el a ricibi na su curpa, ya cu ta posibel cu e auto a bolter tambe.  Vehiculo di Rescate di Cuerpo di Bombero tambe a yega na e lugar pa duna un man.

   Auto ta un A-nummer: Ta trata aki di un auto Hyundai Accent color shinishi scur cu number A-82571.  Ambulance despues di algun rato di ta CPR, a pone aparato y a detecta cu e persona di edad mas grandi no ta reacciona mas, no tin señal vital, y a sugeri pa Polis manda busca Dokter.

   E otro herido tabata e chauffeur, y el a wordo poni riba brancard y transporta cu Ambulance mientras tanto pa Servicio di Emergencia di Hospital HOH.  Polis a describi su situacion como ‘grave’, aunke eybao a mira cu e ta na tino y tabata pone man na cabez ora cu el a haya sa cu e otro persona no tin señal vital mas.

   Polis di Trafico hunto cu team forensico di BFTO a yega pa documenta tur cos.  A keda na Dokter Forensico pa constata morto di e turista Dwann Kaleid Gatewood, di 49 aña naci na Merca dia 10 di October 1976.  Pues aki 3 dia lo a cumpli 50 aña di edad.

   Di diesdos morto: Vocero Liliana Rasmijn di Cuerpo Policial a splica cu e turista Gatewood a bira e di 12 morto den trafico pa aña 2026.  Apenas 49 ora despues di e accident fatal cu motorcycle na Westpunt.

   Bureau Slachtofferhulp a presenta pa asina brinda sosten na famia di e fayecido.

   Polisnan a keda te basta laat di marduga na e lugar pa e investigacion a keda completo.  DIARIO y Cuerpo Policial Aruba ta manda palabra di condolencia na famia di e fayecido.