SKOA a reuni mas di 600 profesional di enseñansa pa un dia di inspiracion y desaroyo

Durante ‘SKOA Nationaal Onderwijs Congres’

ORANJESTAD (AAN): Den cuadro di Dia Mundial di Maestro, Stichting Katholiek Onderwijs Aruba (SKOA) a organiza un congreso dedica na desaroyo personal y profesional di su docentenan. Durante e dia aki, alumnonan no tabatin les, mientras e personal docente a participa den un programa enfoca riba inspiracion, bienestar y crecemento.

   E di nuebe edicion di Het SKOA Nationaal Onderwijs Congres a tuma luga dialuna na Hilton Grand Ballroom, for di mainta tempran te atardi. Mas di 600 profesional di enseñansa a reuni pa intercambia experiencia, adkiri mas conocemento riba temanan actual di enseñansa y reflexiona riba nan papel den formacion di e generacionnan futuro.

   Hefe di Recurso Humano di SKOA, Jessica Irausquin, a splica cu e stichting ta evalua continuamente e transcurso di cada aña escolar, cu e meta di sigui eleva e calidad di enseñansa y ofrece su personal oportunidadnan di desaroyo. E congreso ta forma parti di e esfuerso continuo aki.

   E programa a conta cu contribucion di oradornan local y internacional, entre otro di Hulanda, Belgica y New Zealand. Cu nan diferente perspectiva y experiencia, nan a inspira e participantenan y a ofrece ideanan pa aplica tanto den nan bida personal como den nan trabao diario.

   E congreso a enfatisa cu inverti den e desaroyo y bienestar di maestro ta tambe inverti den e futuro di mucha. Cu conocemento nobo y motivacion renoba, e docentenan por sigui fortalece un ambiente di siñansa den cual cada alumno tin oportunidad pa crece y desaroya su talento.