Alex Matthew a papia cu prensa mustrando pakico tin di cuminza graba casonan den Corte

Como representante di Chania Fernandez Pedra:

ORANJESTAD (AAN)-- Señor Alex Matthew, como un di e representantenan di Chania Fernandez Pedra, a yama un conferencia di prensa Dialuna mainta, cu a tuma lugar na su oficina, cu e meta di pidi gobierno un “par di voz”.

   “Pasobra cu nos ta ripara cu e caso manera ta sosodiendo hopi cos no ta bay, manera mester bay. Anto ora bo pidi un process verbal, esaki ta locual a sosode den Corte y nos ta ripara cu den e process verbal hopi cos no ta confort, nan no ta nota locual berdaderamente ta sosode den Corte.

   Locual nos ta nota tambe ta cu prensa ta den sala, pero hopi cos ta wordo papia pa mustra cu ta Chania ta, eigenlijk, echa bayna y cu e no kier un abogado. Pueblo ta wak manera Chania ta haciendo cierto cosnan cu e mes ta busca forma pa stroba e proceso pa e no por tin un abogado”, Matthew a señala.

   El a sigui splica cu dia 2 di October e caso a sosode, y nan ta ripara cu e Huez (un Hulandes), tabata bisa Chania cu e mester tin un abogado, y a puntre di con e no kier e abogado y cu nan ta haya un abogado p’e, pa haci comosifuera ta Chania ta esun cu no kier tin un abogado.

   Matthew a expresa cu pakico nan tabata tey den e conferencia di prensa aki, ta pasobra ta hopi duidelijk locual mester aki na Aruba.

   “Locual nos mester tin na Aruba pa tin sikiera un tiki husticia ta pa e grabacion den Corte tuma lugar. Nos mester tin grabacion den Corte, e prensa por mester graba locual ta sosodiendo den Corte, sikiera audio, anto e griffier mester por tin un grabacion di kico ta sosodiendo, pa e por graba tur e minuutnan di locual ta pasando den Corte pa e abogado, despues, por haya exactamente locual a sosode den Corte. No un ‘short hand’ di un griffier cu ta laga despues, hopi afo di locual a sosode|”, Alex Matthew a remarca.