Rene Herdé ta reafirma compromiso cu AVP y Era di Relevo

ORANJESTAD (AAN): Minister Rene Herdé ta reafirma su compromiso cu Partido AVP, na cual e ta miembro desde 1990 y

ta sostene e Era di Relevo di e Partido completamente.  Minister Herde a cuminsa su trayectoria profesional na 1980 den loke e tempo ey tabata Gebiedsbestuur di Aruba. Durante su carera den sector publico, el a participa den preparacionnan relaciona cu e Status Aparte di 1986 y despues a traha riba renobacion di enseñansa y e introduccion di Papiamento den Enseñansa.

   Na 2025, AVP a acerca Herde atrobe, inicialmente pa e posicion di Gevolmachtigde Minister na Den Haag. E candidatura tabata parti di e formacion di e Gabinete nobo AVP/Futuro. Cu su regreso na 2025 pa sirbi pueblo, Herde a asumi e responsabilidad di minister den e area di infrastructura, energia y telecomunicacion. E nombramento y su trayectoria a wordo presenta como continuacion di un carera cu ta conecta servicio publico, maneho, enseñansa y politica.

  “AVP ta mi partido, awe, mañan y semper.” Cu e punto di bista aki, Herde ta enfatisa su vinculo historico cu e partido, mientras e ta reconoce tambe e importancia di duna espacio na un generacion nobo pa sigui construi riba e experiencia acumula durante añanan.

   Minister Herde ta gradici Mike Eman pa lidera AVP pa 25 aña y ta desea Wendrick Cicilia hopi exito como lider nobo. Pa Herde, e era di relevo ta forma parti di e proceso natural di un organizacion politico, den cual experiencia y energia di generacionnan diferente por sigui contribui na e futuro di Aruba.